बेनी : म्याग्दीको अन्नपूर्ण गाउँपालिका–४ नारच्याङको भूगोलमा पर्ने आठ हजार ९१ मिटर अग्लो अन्नपूर्ण हिमालको आरोहण आधार शिविर आन्तरिक पर्यटकको रोजाइमा पर्न थालेको छ । पदमार्ग निर्माण र प्रचारप्रसारसँगै पछिल्लो एक वर्षयता अन्नपूर्ण आधार शिविरमा हिउँदको तीन महिना बाहेकको समयमा दैनिकजसो पर्यटकहरु पुग्ने गरेका छन् ।
दुई वर्ष अघिसम्म बसन्त ऋतुमा हिमाल आरोहणका लागि आउने हेलिकप्टर मार्फत पुग्ने आरोही र तीनका सिमित सङख्यामा सहयोगीहरू मात्रै आधार शिविरमा हुन्थे । अन्नपूर्ण गाउँपालिका–४ का वडा अध्यक्ष लोकबहादुर फगामीका अनुसार चालु शरदयाममा करिब चार हजार जना आन्तरिक पर्यटकहरू अन्नपूर्ण आधार शिविरको भ्रमणमा गएका छन् ।
यो याममा हालसम्मकै धेरै संख्यामा पर्यटकहरू अन्नपूर्ण आधार शिविर गएका उनले बताए । बेनी, काठमाडौं, पोखरा, बागलुङ, चितवनलगायत सहरबाट विशेष गरेर जागिरे र युवा युवतीहरू अन्नपूर्ण आधार शिविरको पदयात्रामा गएका छन् ।
अन्नपूर्ण र निलगिरि हिमालको फेदीबाट बग्ने मिस्त्रीखोलाको किनारै किनार,अग्ला झरना,मनमोहक हिमशृङ्खला,अनौठो भूगोल, पहाड, दुर्लभ वनस्पति, वन्यजन्तुको अवलोकन गर्दै आधार शिविर पुग्न सकिन्छ ।
अन्नपूर्ण हिमालको फेदीमा रहेको निलो रङगको पञ्चकुण्ड ताल आधार शिविरको आकर्षण हो । आधार शिविर पुगेर फर्किएका म्याग्दी उद्योग वाणिज्य संघका अध्यक्ष सुविन श्रेष्ठले यो क्षेत्र भर्जिन गन्तव्य भएको बताए । तीन दिनको छोटो अवधीमा साहासिक पदयात्रा गर्न सकिने भएकाले पर्यटकको रोजाईमा अन्नपूर्ण आधार शिविर परेको हो । होटल तथा लजको सुविधा नभएको मौरिस हर्जोग पदमार्ग र अन्नपूर्ण आरोहण शिविरमा जानेहरुले खाना, खाजाका परिकार, भाडाकुडा, ग्याँस, लत्ताकपडाको आफै जोहो गर्नुपर्छ ।
फ्रान्सका मौरिस हर्जोग र लुई लचेनलले सन् १९५० को जुन ३ का दिन आरोहण गरेको अन्नपूर्ण आठ हजार मिटर भन्दा अग्लो पहिलो मानव पाइला परेको हिमाल हो । सगरमाथा भन्दा तीन वर्ष अघि आरोहण भएको अन्नपूर्णलाई जेठो हिमाल भनिन्छ ।
हर्जोगको टोलीले अन्नपूर्ण चढ्न प्रयोग गरेको बाटो पछ्याउदै नारच्याङका तेज गुरुङको अगुवाईमा विसं २०६८ मा अन्नपूर्ण हिमाल र आधार शिविर म्याग्दीमा पर्ने तथ्य तथा पदमार्ग पहिचान भएको थियो । सो पदमार्गलाई अन्नपूर्ण गाउँपालिकाले ‘मौरिस हर्जोग’ नामाकरण गरेको छ । नारच्याङ देखि हुमखोला सम्म २० किलोमिटर सडक र हुमखोला देखि आधार शिविर सम्म आधारभूत स्तरको २२ किलोमिटर पदमार्ग तयार भएको छ ।
पदमार्गको स्तरोन्नति, खोलामा झोलुङ्गे पुल निर्माण, आश्रयस्थलको क्षमता विस्तार, खानेपानी, शौचालय, सञ्चार, विद्युत सुविधा र सुरक्षाको व्यवस्थापनका लागि एकिकृत गुरुयोजना तयार पारिएको अन्नपूर्ण गाउँपालिकाका अध्यक्ष भारतकुमार पुनले बताए ।
चालु आर्थिक वर्षमा बिनियोजन भएको एक करोड रुपैयाँ बजेटबाट आश्रयस्थलको क्षमता विस्तार, शौचालय, खानेपानी, पुल लगायत पूर्वाधार निर्माणमा परिचालन गरिने उनले बताए । पदमार्गमा पाहुनाको बसाई व्यवस्थापन र बढ्दो प्रदूषण चुनौति बनेको छ । मौरिस हर्गोज पदमार्गमा पर्यटक लैजान सहजिकरण गरिरहेका सुरेन गुरुङले पदयात्रीहरुले फालेको पलास्टिक,स्टिल र सिसाजन्य फोहोरका कारण प्रदूषण बढेको बताए ।
‘पदमार्ग र आधार शिविरमा पलास्टिक, कागज, कपडा, स्टिल र सिसाले फोहोर भएको छ,’उनले भने, ‘कुहिने फोहोरलाई खाडलमा गाड्ने,नकुहिनेलाई व्यवस्थापन नगर्ने हो भने यहाँको सुन्दरतामा असर पर्न सक्छ ।’
कति मात्रामा फोहोर छ भन्ने एकिन नभएपनि पदयात्रीहरुले सामान राखेर लगेका पलास्टिक, बोरा, बट्टा, बोत्तल, कपडा र ग्याँसको खाली सिलिण्डर यत्रतत्र फालेका भेटिने गुरुङले बताए । फोहोर बढेपछि अन्नपूर्ण गाउँपालिका र घराम्दीका खेलाडीहरुको टोलीले पछिल्लो एक महिनाको अवधीमा दुई पटक उक्त पदमार्ग र आधार शिविर क्षेत्रमा सरसफाई गरेका छन् । पदमार्गमा व्यवस्थित शौचालयको पनि अभाव छ ।
फुतफुते भरना नजिकै रघुगङ्गा गाउँपालिका–१ बेगकी ललिता शेरपुञ्जाको अगुवाईमा सार्वजनिक शौचालय निर्माण भएको छ । भुसकेतमा अन्नपूर्ण संरक्षण क्षेत्र आयोजना (एक्याप)को सहयोगमा गत वर्ष शौचालय निर्माण भएको थियो । सम्धीखर्क, आरोहण आधार शिविर र पञ्चकुण्ड तालको आश्रयस्थलमा बास बस्ने पर्यटकहरुलाई शौचालयको समस्या भएको बेनीका कनक प्रधानले गुनासो गरे ।
प्रतिक्रिया दिनुहोस !
