विराटनगर : पूर्व–पश्चिम राजमार्गअन्तर्गत मोरङको उर्लाबारी नगरपालिका–३ नयाँ मंगलबारेमा बिहीबार अपरान्ह मोटरसाइकल दुर्घटना भएर मृत्यु हुनेको संख्या तीन पुगेको छ ।
प्रहरीका अनुसार दुईवटा मोटरसाइकल एकआपसमा ठक्कर खाएर अपरान्ह ४:४५ बजेतिर दुर्घटना भएको हो । पश्चिमबाट पूर्वतर्फ जाँदै गरेको प्रदेश १–०२–०५० प ८४०६ र पूर्वबाट पश्चिमतर्फ आउँदै गरेको प्रदेश १–०२–०४३ प ९२२६ नम्बरको मोटरसाइकल ठोक्किएर दुर्घटना भएको मोरङ प्रहरी प्रमुख एसपी नारायणप्रसाद चिमरियाले जानकारी दिए ।
उनका अनुसार दुर्घटनामा परेर मोरङको पथरीशनिश्चरे नगरपालिका–५ का अन्दाजी ४०÷४२ वर्षीय दीपक धिमाल, कानेपोखरी गाउँपालिका–४ रमाइलोका अन्दाजी २७/२८ वर्षीय किशोर गुरुङ र कानेपोखरी–४ कै अन्दाजी २८ वर्षीय अमृत लिम्बूको मृत्यु भएको हो । गम्भीर घाइते भएपछि उपचारका लागि धिमाललाई उर्लाबारीकै अरनिको अस्पताल र गुरुङलाई मदन भण्डारी अस्पताल एवं ट्रमा सेन्टर लगिएको थियो ।
प्रहरीका अनुसार पुर्याउनसाथ चिकित्सकले मृत घोषित गरेका हुन् । झापाको बिर्तामोडस्थित बी एन्ड सी अस्पताल लगिएका लिम्बूलाई उपचारका
क्रममा साँझ पौने ७ बजेतिर चिकित्सकले मृत घोषित गरेको जानकारी प्रहरीले दिएको छ । लिम्बूको मृत्युसँगै उर्लाबारी दुर्घटनामा ज्यान गुमाउनेको संख्या तीन पुगेको हो ।
दुर्घटनामा पथरीशनिश्चरे–५ का २५/३० वर्षीय विष्णु धिमाल गम्भीर घाइते भएको एसपी चिमरियाले बताए । उनका अनुसार बी एन्ड सी अस्पतालमा उपचार भइरहेको छ । दुर्घटनामा परेर दुवै मोटरसाइकल पूर्णरूपमा क्षतिग्रस्त भएका छन् । प्रदेश १–०२–०५० प ८४०६ नम्बरको मोटरसाइकलका चालक दीपक धिमाल रहेको प्रहरीले पत्ता लगाएको छ । अर्को मोटरसाइकलका चालकको नाम खुलेको छैन ।
प्रतिक्रिया दिनुहोस !
