रुकुमपूर्वमा उप-निर्वाचनको सरगर्मी : कोही मतदाता शिक्षा दिँदै, कोही भेटघाटमा व्यस्त

रुकुमपूर्व : रुकुम पूर्वको पुथाउत्तरगंगा गाउँपालिकामा उप–निर्वाचनको चहलपहल बढेको छ। नेकपा माओवादी र नेकपा एमाले चुनावी एजेण्डा लिएर गाउँ पसेका छन् । पुथामा मङ्सिर १६ गते गाउँपालिका उपाध्यक्ष पदको लागि उप–निर्वाचन हुन लागेको हो।

उप–निर्वाचनलाई लक्षित गरेर उपाध्यक्ष पदको लागि नेपाली कांग्रेस र एमाले तथा माओवादी केन्द्र र नेकपा एकीकृत समाजवादीको गठबन्धन चुनावी मैदानमा छन् । नेपाली कांग्रेस– एमाले गठबन्धनबाट एमालेकी केशकुमारी तुलाचन र नेकपा माओवादी केन्द्र–नेकपा एस गठबन्धनबाट माओवादीकी नरपुरा बुढा पुनको उम्मेदवारी छ । अहिले पार्टीहरू चुनावी प्रचारप्रसारमा व्यस्त छन् ।

उप- निर्वाचनका लागि उम्मेदवारसहितको वडास्तरीय कोण सभा,पार्टी प्रशिक्षण,भेटघाट,टोलस्तरीय बैठक, मतदाता शिक्षाजस्ता कार्यमा जोड दिइएको नेकपा माओवादी केन्द्रकी जिल्ला संयोजक कुमारी बरालले जानकारी दिए । 

त्यस्तै कांग्रेस–एमाले गठबन्धन पनि मतदाता रिझाउन लागि परेका छन् । मतदाता तथा जनभेटघाट, छलफल जस्ता कार्यक्रम गरेर चुनावी एजेण्डाबारे जानकारी गराउने काम भइरहेको नेकपा एमालेका जिल्ला अध्यक्ष लीलामणि गौतमले बताएका छन ।

काजु वडाध्यक्षमा निर्विरोध निर्वाचित

रुकुमपूर्वको पुथाउत्तरगंगा गाउँपालिका वडा नम्बर २ मा नेकपा माओवादी केन्द्रका उम्मेदवार निर्विरोध निर्वाचित भएका छन् । नेपाली कांग्रेस र नेकपा एमालेका संयुक्त उम्मेदवार नेकपा एमालेका जीवन रोकाले उम्मेदवारी फिर्ता लिएपछि माओवादी केन्द्रका जगत घर्ती मगर (काजु) निर्विरोध निर्वाचित भएका हुन । 

निर्वाचन तालिका अनुसार बुधबार उम्मेदवारहरूलाई आफ्नो उम्मेदवारी फिर्ता लिनका लागि समय दिइएको थियो । उक्त समयमा नेपाली कांग्रेस र नेकपा एमालेका संयुक्त उम्मेदवार रोकाले उम्मेदवारी फिर्ता लिएका थिए । अन्य कुनै उम्मेदवार नभएपछि माओवादी केन्द्रका (काजु) निर्विरोध निर्वाचित भएका हुन् ।

कांग्रेस–एमालेको तर्फबाट उम्मेदवारी दिएका  रोकाले माओवादीका उम्मेदवार आफन्त पर्ने भएकाले नाम फिर्ता लिएको बताएका छन् । उनले भने,'हामी एउटै घरको नाता पर्ने हो । माओवादीका उम्मेदवार काका नाता पर्छन्, भेगीय हिसाबमा पनि एउटै परियो,'उनले भनेका छन्, 'पार्टीले के गर्ने भन्ने कुरा उसको हो । गाउँपालिका उपाध्यक्षमा पार्टीकै उम्मेदवार जिताउन लाग्छु । आफ्नो खुसीले उम्मेदवारी फिर्ता लिएको हो, पार्टीले कारबाही गरे स्वीकार्छु ।'

यता नेकपा एमालेले २ नम्बरका वडा अध्यक्ष पदका उम्मेदवार रोकाले पार्टीको निर्णय विपरीत उम्मेदवार फिर्ता लिएको भन्दै उनलाई पार्टीको सबै जिम्मेवारीबाट निलम्बन गरिएको एमालेका जिल्ला अध्यक्ष लिलामणी गौतमले बताएका छन् । माओवादी केन्द्रले भने भारी मत लिएर जित्ने दाबीका साथ १४ वटै वडामा आफ्नो गतिविधिलाई तीव्र पारेको छ । माओवादी नेता तथा पूर्व मन्त्रीहरु गणेशमान पुन, दलजित शेर्पाली, कमला रोका, सांसद पूर्ण घर्ती, वाईसिएलका केन्द्रीय अध्यक्ष सुबोध शेर्पालीलगायतको टिम जिल्लामा जमेरै बसेको छ । 

गत भदौ २८ गते काठमाडौंबाट रुकुमपूर्व आउँदै गरेको पुथाउत्तरगंगा गाउँपालिकाको गाडी बागलुङमा दुर्घटना हुँदा गाउँपालिका उपाध्यक्ष भूपेन्द्र बुढा मगर र २ नम्बर वडा अध्यक्ष जसबहादुर शेर्पालीको निधन भएको थियो ।