युवकको बयान : होसमा थिइनँ, महिलाको शव बोक्ने मै हुँ, हत्या गरेको होइन

काठमाडौं : गत मंसिर ७ गते कालीमाटीस्थित संगीत मार्गको सडक छेउमा एक महिला मृत भेटिइन् । कुलेश्वर बस्ने दोलखाकी ४५ वर्षीया जानुका सुर्खेतीको शव सडकमा फालिएको अवस्थामा भेटिएको थियो ।

एकाबिहानै सडकमा महिलाको शव भेटेपछि स्थानीयले प्रहरीलाई खबर गरे । प्रहरी वृत्त कालीमाटी र उपत्यका अपराध अनुसन्धान कार्यालयको टोलीले घटनाको अनुसन्धान गर्‍यो । अनुसन्धानको क्रममा उक्त एरियाको सीसीटिभी फुटेज हेर्ने क्रममा सोही दिन रातको ३.१७ बजे एक युवकले उनै महिलाको शव बोकिरहेको भेटिएको थियो ।

जिल्ला प्रहरी परिसर काठमाडौंका प्रवक्ता नवराज अधिकारीका अनुसार सीसीटिभी फुटेज अनुसार ती युवकले कालीमाटीको डिभाइन कम्प्लेक्सको सडक छेउबाट उक्त महिलाको शव बोकेर सडकमै फालेका थिए । सोही आधारमा प्रहरीले लास बोक्ने युवकलाई पक्राउ गरेर नियन्त्रणमा लिएको छ ।

पक्राउ पर्नेमा बझाङको बित्थडचिर–९ का २२ वर्षीय कविन्द्र मल्ल छन् । उनलाई कुलेश्वरबाट पक्राउ गरिएको थियो । उनीविरुद्ध ज्यानसम्बन्धी कसुरमा अनुसन्धान भइरहेको छ । महिलाको शव पोस्टमार्टमका लागि शिक्षण अस्पताल महाराजगन्जमा पठाइएको थियो ।

प्रहरी वृत्त कालीमाटीका डीएसपी रूपक खड्काका अनुसार सीसीटिभी फुटेजमा ती युवकले महिलालाई कुनै कुटपिट गरेको देखिँदैन । महिलाको शरीरमा चोटपटक पनि छैन ।

उपत्यका अपराध अनुसन्धान कार्यालयका प्रवक्ता काजीकुमार आचार्यका अनुसार उक्त घटनामा मृत्यु भएकी महिलाको पोस्टमार्टम रिपोर्ट आएको छ । त्रिवि शिक्षण अस्पतालका फरेन्सिक चिकित्सकले गरेको शव परीक्षण रिपोर्टअनुसार लिभरको समस्याका कारण उनको मृत्यु भएको देखिएको छ । पोस्टमार्टम रिपोर्टमा उनको मृत्युको कारणबारे लेखिएको छ, ‘डिजिज अफ द लिभर ।’

हत्या गरेको पुष्टि भएन
हत्या आशंकामा पक्राउ परेका बझाङका मल्ल प्रहरी हिरासतमा छन् । पोस्टमार्टम रिपोर्टमा भने ती महिलाको मृत्यु कलेजोको समस्याले कारण भएको भन्ने छ । यही रिपोर्टलाई हेर्ने हो भने पनि कविन्द्रले ती महिलाको हत्या गरेको देखिँदैन । उनको स्वभााविक मृत्यु भएको देखिन्छ ।

प्रहरी वृत्त कालीमाटीका डीएसपी रूपक खड्काका अनुसार सीसीटिभी फुटेजमा ती युवकले महिलालाई कुनै कुटपिट गरेको देखिँदैन । महिलाको शरीरमा चोटपटक पनि छैन । युवकले बोक्नु अघि ती महिला त्यहीको सडकमा बसिरहेको अवस्थामा सीसीटिभी फुटेजमा देखिन्छ । उनको मृत्यु कहाँ, कसरी भयो भन्ने विषयमा अनुसन्धान भइरहेको डीएसपी खड्काले बताए ।

खड्का भन्छन्, ‘प्रारम्भिक अनुसन्धानका क्रममा पक्राउ परेका युवकले आफू लागूऔषध अम्मली भएको बताएका छन् । घटना भएको युवकले आफू होसमा नरहेको र किन कसको लास बोकेको भन्ने केही थाहा नभएको बताएका छन् । तर, उनले महिलाको शव बोक्ने आफू नै भएको स्विकार गरेका छन् तर हत्या गरेको विषयमा अस्वीकार गरेका छन् ।’

पक्राउ परेका मल्ल पहिलोपटक पक्राउ परेका भने हैनन् । उनको पृष्ठभूमि आपराधिक प्रवृत्तिको छ । यसअघि १० पटक विभिन्न कसुरमा हिरासत बसिसकेका छन् । उपत्यका अपराध अनुसन्धान कार्यालयका प्रवक्ता काजीकुमार आचार्यका अनुसार महिलाको हत्या आरोपमा संलग्न मल्ल १० पटक पक्राउ परिसकेका छन् । २०७७ चैतमा प्रहरी वृत्त जनसेवाले उनीविरुद्ध अभद्र व्यवहार मुद्दा चलाएको थियो ।

२०७८ वैशाख र भदौमा प्रहरी वृत्त कालीमाटीमा, २०७९ वैशाखमा बझाङमा, २०७९ असारमा कालीमाटीमा र २०८० जेठमा उनी सिंहदरबार वृत्तमा थुनामा परेका थिए । २०८१ कात्तिकमा उनलाई चोरी तथा डाँका मुद्दामा प्रहरी वृत्त कालीमाटीले नै पक्राउ गरेर अनुसन्धान गरेको थियो । २०८१ वैशाख र भदौमा उनी अभद्र व्यवहारसम्बन्धी कसुरमा पक्राउ परेका थिए ।

आरोपित मल्लविरुद्ध कसरी बढ्छ अनुसन्धान ?

उपत्यका अपराध अनुसन्धान कार्यालयका प्रवक्ता आचार्यले घटनाको अनुसन्धान पूरा नभएकाले यही नै निर्णय हुन्छ भनेर कन्फर्म गर्न नसकिने जानकारी दिए ।

उनी भन्छन्, हत्या आरोपमा पक्राउ परेका उनीविरुद्ध अन्य कसुर पनि आकर्षित हुन सक्छन् । पोस्टमार्टम रिपोर्ट र आरोप नमिलेको अवस्थामा उनीविरुद्ध मृतक महिलाको लास गलत नियतले ओसारपसार गरेको कसुरमा पनि अनुसन्धान हुन सक्छ । पोस्टमार्टम रिपोर्ट नमिल्नासाथ उनी छुटिहाल्ने भन्ने हुँदैन ।

प्रहरी प्रतिवेदनमा आरोपितले हत्या गरेको भन्ने प्रमाण पुष्टि भएन भनेर पनि लेख्न सकिन्छ । अनुसन्धान सकिएपछि मिसिल अदालतमा दर्ता गरिन्छ । अदालतको आदेशअनुसार नै निर्दोष सावित हुने वा थुनामै रहने निर्क्योल हुन्छ ।