विराटनगर : विराटनगर महानगरपालिका–१० मा रहेको ‘रेड स्टार’ गीत गजलका सञ्चालक शनिबार बिहान मृत फेला परेका छन्।
मोरङ प्रहरीका प्रवक्ता डीएसपी वेदप्रकाश जोशीले गीत गजलका सञ्चालक विराटनगर–१२ का ३८ वर्षीय भीम राई मृत फेला परेको जानकारी दिए। उनका अनुसार शुक्रबार राति गीत गजलमै सुतेका राई शनिबार बिहान ८ः३० बजेतिर अचेत अवस्थामा भेटिएका थिए। बेहोस अवस्थामा फेला पारेर गीत गजलकै कर्मचारीले उपचारका लागि विराटनगरको कोशी अस्पताल पुर्याए।
अस्पताल पुर्याउनसाथ बिहान ९ बजेतिर चिकित्सकले मृत घोषित गरिदिएको डीएसपी जोशीले बताए। शवलाई पोस्टमार्टमका लागि कोशी अस्पतालमै राखिएको छ। घटनाका बारेमा थप बुझ्न र अनुसन्धान गर्नका लागि वडा प्रहरी कार्यालय विराटनगरबाट इन्स्पेक्टर राजेश दत्त नेतृत्वको टोली परिचालन गरिएको थियो।
प्रारम्भिक अनुसन्धानबाट घटना शंकास्पद नदेखिएको प्रहरीले जनाएको छ। राईलाई उच्च रक्तचाप र मधुमेहको पुरानै समस्या रहेको प्रहरीले पत्ता लगाएको छ। घटना अनुसन्धानको थप प्रक्रिया अघि बढाइएको जोशीले बताए।
प्रतिक्रिया दिनुहोस !
