प्रधानमन्त्री निवासकै जग्गा व्यक्तिको नाममा दर्ता भएबाटै नेपालमा कुन हदसम्मको भ्रष्टाचार छ भन्ने प्रष्ट हुन्छ । त्यसरी व्यक्तिको नाममा जग्गा पुर्याउने प्रक्रियामा मन्त्रिपरिषदको समेत नीतिगत निर्णय थियो । तर, ललिता निवास जग्गा प्रकरणमा तत्कालीन प्रधानमन्त्री माधवकुमार नेपाल भ्रष्टाचार मुद्दामा अछुतो रहे । भ्रष्टाचार नियन्त्रण गर्न स्थापित संवैधानिक आयोग अख्तियार दुरुपयोग अनुसन्धान आयोगको क्षेत्राधिकारमा नीतिगत निर्णय नपर्दा थुप्रै भ्रष्टाचारका काण्ड त्यसै ढिसमिस भएका थिए र छन्् । तर, अब बन्ने भ्रष्टाचार नियन्त्रणसम्बन्धी कानुनले त्यस्तो निर्णयमाथि अख्तियारको क्षेत्राधिकार समेट््नु सुखद पक्ष हो । भ्रष्टाचार निवारण ऐन २०५९ लाई संशोधन गर्न बनेको विधेयक र अख्तियार दुरुपयोग अनुसन्धान आयोग (तेस्रो संशोधन) विधेयक संसद््को राज्य व्यवस्था तथा सुशासन समितिको उपसमितिबाट पारित भएको छ ।
मन्त्रिपरिषद्् वा त्यसको कुनै समितिले सामूहिक रूपमा गरेको नीतिगत निर्णय सम्बन्धमा आयोगले कुनै कारबाही नगर्ने प्रावधान विद्यमान कानुनमा छ । त्यही भएकाले मन्त्रालय स्तरबाट हुनुपर्ने सामान्य निर्णय र अरू प्रक्रिया मन्त्रिपरिषद्बाटै पारित गराउने बदनियतपूर्ण प्रवृत्ति पनि व्यापक रहँदै आएको छ । उपसमितिले पारित गरेको विधेयक संसदले पारित गर्यो भने मन्त्रिपरिषदले गरेका निर्णयबाट व्यक्ति वा राज्य कसलाई फाइदा पुगेको छ भनी हेर्न सकिने छ र राज्यलाई घाटा पुर्याउने बदनियत देखिए भ्रष्टाचारको मुद्दा चल्न सक्छ ।
भ्रष्टाचार भएको थाहा पाएको मितिले ५ वर्षभित्र मुद्दा लाग्न सक्ने विद्यमान व्यवस्था परिवर्तन गरी हदम्याद हटाइनु अर्काे सुखद पक्ष हो । यसबाट भ्रष्टाचारी कहिल्यै पनि उम्कन नसक्ने हुने छ । अख्तियारलाई स्ट्रिङ अप्रेसनमा लगाम कसिएको थियो । तर, विधेयकले अख्तियारलाई नवीनतम प्रविधि प्रयोगलाई प्रोत्साहन गरेको छ । सँगसँगै आयोगको आफ्नै विधि प्रयोगशाला हुनसक्ने व्यवस्थाले भ्रष्टाचारका प्रमाण जुटाउन सजिलो पर्ने छ । बेनामे उजुरी अख्तियारले स्वीकान सक्ने पुरानै व्यवस्थालाई कायम गरिनु पनि अर्काे सुखद पक्ष हो । नाम खुलाएर उजुरी गर्ने व्यवस्था भएको भए भ्रष्टाचारविरुद्ध जोकोहीले उजुरबाजुर गर्ने वातावरण हुँदैनथ्यो, उजुरीकर्ताले सुरक्षित महसुस गर्दैनथ्यो । अख्तियार दुरुपयोग अनुसन्धान आयोग बलियो बनाउनु भनेको राज्य भ्रष्टाचारप्रति निर्मम बन्नु हो । भ्रष्टाचार नियन्त्रणका लागि त्यो निर्ममता आवश्यक थियो र छ ।
प्रतिक्रिया दिनुहोस !
