पोखरा : सहकारी ठगीका आरोपित पूर्वडीआईजी छविलाल जोशीको दोस्रो दिनको बयान सुरू भएको छ। कास्की जिल्ला अदालतका सूचना अधिकारी सुरज अधिकारीले जोशीको बयान जारी रहेको अन्नपूर्णलाई जानकारी दिए। सोमबार बयान नसकिएकाले मुद्दा हेर्दाहेर्दैमा राखिएको थियो।
राष्ट्रिय स्वतन्त्र पार्टीका सभापति रवि लामिछानेसहित पाँचजना प्रतिवादीको सोमबारदेखि जिल्ला अदालत कास्कीमा बयान सुरू भएको छ। रविसहित पाँचजनालाई अदालत उपस्थित गराइए पनि सोमबार जोशीको बयान लिइएको थियो।
सोमबार जोशीको बयान नसकिएकाले आज पुन: बयान लिन लागिएको हो। बयानका क्रममा जोशीले गोरखा मिडियाबाट आफूले एक पैसा पनि नदिलएको दावी गरेका छन्। बयानका लागि लामिछाने,जोशी,लिला पछाई र रामबहादुर खनाललाई अदालत उपस्थित गराएको छ। अर्का आरोपित कृष्ण गुरूङ भने बिरामी परेकाले अदालतमा उपस्थित हुन सकेका छैनन्।
पोखराको सूर्यदर्शन सहकारीको तर्फबाट जिल्ला अदालत कास्कीले दायर गरेको अभियोग पत्रअनुसार सहकारी ठगी,संगठित अपराध र सम्पत्ति शुद्धीकरणको बयान कार्य सोमबार जोशीबाट सुरु भएको थियो।
जोशीको सोमबार साढे दुई घण्टा बयान लिइएको थियो। आज उनको सकिएपछि बाँकी प्रतिवादीहरूको बयान लिइने बताइएको छ। सम्भवत मंगलबार लामिछानेको बयान सुरू हुने बताइएको छ।
सरकारी वकिलको कार्यालयले पोखराको सूर्यदर्शन सहकारीको रकम ठगी प्रकरणमा अहिलेसम्म ६३ जनाविरुद्ध जिल्ला अदालत कास्कीमा मुद्धा दायर गरेको छ। लामिछानेमाथि सम्पत्ति शुद्धीकरणमा २७ करोड ८९ लाख ४४ हजार ७ सय बिगो दाबीसहति मुद्दा दर्ता गरिएको छ। यस्तै पूर्वडीआईजी छविलाल जोशीविरुद्ध पनि सम्पत्ति शुद्धीकरणसम्बन्धी अभियोग पत्र दायर गरिएको छ। जोशीले ७४ करोड, ३४ लाख ७१ हजार ५५ रुपैयाँ ५२ पैसा गैरकानुनी ढंगले आर्जन गरेको दाबी गर्दै बिगो कायम गरिएको छ।
यसै गरी लीला पछार्इंलाई २४ करोड ६७ लाख ७ हजार ३४ रुपैयाँ बिगो कायम गरिएको छ। अर्का प्रतिवादी रामबहादुर खनाललाई १४ करोड ३० लाख ९१ हजार ९ सय ११ रुपैयाँ बिगो कायम गरिएको छ। पछाई र खनालविद्ध पनि सम्पत्ति शुद्धीकरणमा मुद्दा दायर भएको हो।
सहकारीको बचत रकम उपचलन गरेको आरोपमा रास्वपा सभापति लामिछाने गत कात्तिक २ गते काठमाडौंबाट पक्राउ परेका थिए। सूर्यदर्शन सहकारी ठगीको मुख्य योजनाकार जीबी राईलगायत अन्य आरोपी भने अझै पनि फरार छन्।
रविसहति पाँचजना प्रतिवादीको मुद्धा कान्छा उमेरका न्यायाधीश नीतिज राईको इजलासमा परेको छ।
प्रतिक्रिया दिनुहोस !
