काठमाडौं : पश्चिमी न्यून चापीय प्रणाली सक्रिय हुँदा मुलुकभरको तापक्रममा गिरावट आएको छ । जसका कारण मुलुकभर चिसो बढेको छ ।
सुदूरपश्चिम र कर्णाली प्रदेशका हिमाली तथा उच्च पहाडी क्षेत्रमा हिमपात र हल्का वर्षासमेत भएको छ । जल तथा मौसम विज्ञान विभाग, मौसम पूर्वानुमान महाशाखाका मौसमविद् सञ्जीव अधिकारीका अनुसार पश्चिमी न्यून चापीय प्रणालीको असर सुदूरपश्चिम र कर्णाली प्रदेशमा बढी देखिएको छ । जसले गर्दा हिमाली एवं उच्च पहाडी भेगमा सोमबार रातिदेखि नै हिमपात र हल्का वर्षा भएको हो । यस्तो न्यून चापीय प्रणाली सुदूरपश्चिमबाट भित्रिएको मौसम पूर्वानुमान महाशाखाले जनाएको छ ।
यो प्रणाली कर्णाली, लुम्बिनी र गण्डकी हुँदै पूर्वतर्फ विस्तारित भएको छ । हावाको चाप कम भएको अवस्थालाई न्यून चापीय भनिन्छ । चाप जता कम हुन्छ हावा त्यतै बहने गर्छ र उक्त भू–भागमा बादल जम्मा भई हल्का वर्षा हुने हुन्छ ।उच्च हिमाली एवं पहाडी भूभागमा हिमपात हुने क्रम बुधबार दिउँसोसम्म कायम रहने मौसमविद् अधिकारीले जानकारी दिए ।
हावाको न्यून चापीय प्रणालीको प्रभाव सुदूर र कर्णाली प्रदेशमा बढी देखिएको छ । सोमबार साँझदेखि सुदूरपश्चिमका जिल्लाहरू बझाङ, बाजुरा, डोटी, डडेलधुरा, दार्चुला, बैतडीका उच्च पहाडी तथा हिमाली भेगमा हल्का हिमपात भएको छ । त्यस्तै कर्णाली प्रदेशको हुम्ला, जुम्ला लगायतका जिल्लामा पनि हिमपात भएको छ । मौसमविद् अधिकारीका अनुसार, लुम्बिनी प्रदेशको रुपन्देही, गण्डकी प्रदेशको तनहुँ बागमती प्रदेशको चितवन आसपासमा छिटफुट वर्षा भएको छ ।
मौसमविद् अधिकारीले भने, ‘अन्य प्रदेशमा भन्दा सुदूरपश्चिम र कर्णाली प्रदेशमा नै सबैभन्दा बढी हिमपात र छिटफुट वर्षासमेत भएको छ ।’
मौसम बदली भएसँगै चिसो बढ्दा हिमाली र उच्च पहाडी जनजीवन प्रभावित भएको छ । मध्य तथा पूर्वीतराईका केही स्थानहरूमा हुस्सु लाग्न थालेको छ । हिमपात, छिटफुट वर्षा र हुस्सुको प्रभावले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने हुँदा त्यसबाट हुन सक्ने असरबाट समेत बच्न आवश्यक सतर्कता अपनाउन मौसम पूर्वानुमान महाशाखाले अनुरोध गरेको छ ।
मौसमविद् अधिकारीका अनुसार कर्णाली, गण्डकी र कोशी प्रदेशका उच्च पहाडी भेगका केही भूभागमा बुधबार पनि हिमपात हुन सक्ने देखिएको छ । काठमाडौं उपत्यकामा मंगलबार साँझ हिउँदे वर्षा भएको छ ।
प्रतिक्रिया दिनुहोस !
