भोजपुर : पर्यटकीय टेम्केडाँडा भ्रमण गर्न जाने क्रममा स्कार्पियो दुर्घटना हुँदा घाइते भएकामध्ये एक जनाको मृत्यु भएको छ। मृत्यु हुनेमा झापाको गौरादह नगरपालिका-७ का ६६ वर्षीय झम्कबहादुर घले रहेका छन्। बिहीबार बिहान भोजपुर नगरपालिका-५ बोखिमको डाडाँटोलस्थित प्रदेश १–०२–००२ च ६९२३ नम्बरको स्कार्पियो सडकबाट खस्दा १० जना घाइते भएका थिए।
चालकसहित १० जना सवार उक्त गाडी अनियन्त्रित भइ सडकबाट करिब दुई सय ५० मिटर तल खसेको थियो। घाइते हुनेमा माङ्सेबुङ गाउँपालिका-६, इलामका नविनकुमार राई, उनका साढे २ वर्षे छोरा निगेल राई र सोही स्थानकी मेनुका घले, भोजपुर नगरपालिका ५ की लाक्पादिकी शेर्पा र देवीकला घले, भोजपुर नगरपालिका ५ की जुनुका राई र रामकुमार राई, धरान २ सुनसरीकी ईहायाराना सुब्बा र धरान ८ सुनसरीका चालक सुदीप लिम्बु रहेका छन्।
घाइतेमध्ये देवीकला घलेको अवस्था गम्भीर रहेको जिल्ला प्रहरी कार्यालय भोजपुरले जनाएको छ। घाइतेहरूलाई तत्काल जिल्ला अस्पताल भोजपुर ल्याइएको थियो।
प्रतिक्रिया दिनुहोस !
