काठमाडौं : नेकपा माओवादी केन्द्रले संघीय निजामती सेवासम्बन्धी विधेयकलाई अघि बढाउन सरकारले ढिला गर्न खोजेको आरोप लगाएको छ।
सिंहदरबारमा शुक्रबार बसेका प्रतिनिधिसभा अन्तर्गतको राज्य व्यवस्था तथा सुशासन समिति बैठकमा संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक उपर संशोधनकर्तासँगको छलफलका क्रममा माओवादी प्रमुख सचेतक हितराज पाण्डेले विधेयकको छलफलका क्रममा सामान्य प्रशासन मन्त्री उपस्थित नहुनुले सरकारले नै उक्त विधेयकलाई ढिला गर्न खोजेको महसुस भएको बताए।
उनले संघीय निजामती सेवासम्बन्धी विधेयक अघि नबढ्दा प्रदेश र स्थानीय सरकारले सहज ढंगले काम गर्न नसकेकाले गम्भीर हुन आग्रह गरे।विधेयकलाई छिटो अघि बढाउनका लागि पटक-पटक समितिलाई आग्रह गर्दा कुनै समितिले पनि कुनै ध्यान नै नदिएको उनको भनाइ छ।
समितिले शुक्रबार नै संशोधनकर्तासँगको छलफल सम्पन्न गरेको छ। अब बस्ने बैठकमा सरोकारवालासंग छलफल गरेर दफावार छलफल गरिने समिति सभापति रामहरि खतिवडाले जानकारी दिए।
प्रतिक्रिया दिनुहोस !
