वीरगन्ज : नेपाल क्रिकेट संघ क्यानको आयोजनामा आइतबारदेखि सुरु जय ट्रफी मेन्स एलिट कपको पहिलो दिन वीरगन्जमा भएको खेलमा नेपाल पुलिस क्लबविरुद्ध पहिलो इनिङमा त्रिभुवन आर्मी क्लबले १ सय २१ रन बनाएको छ।
वीरगन्जस्थित नारायणी क्रिकेट मैदानमा जारी खेलमा टस हारेर पहिले ब्याटिङ गरेको त्रिभुवन आर्मी क्लबले ३४.४ ओभरमा अलआउट हुँदै १ सय २१ रनमात्र बनाएको हो। पुलिसका ललित राजवंशीले एक्लैले ७ विकेट लिएपछि आर्मी पहिलो इनिङमा १ सय २१ रनमै सीमित हुन पुग्यो।
आर्मीका लागि कुशल मल्लले २५ रन, भीम सार्कीले २२ रन, विनोद भण्डारीले २१, बसिर अहमदले १२ रन, सोमपाल कामीले ५ रन र सन्तोष कार्कीले १ रन बनाए। पुलिसका लागि ललितले १४.४ ओभर बलिङ गर्दै एक्लैले ७ विकेट लिए भने रसिद खान, श्रवण यादव र कुशल भुर्तेलले समान एक–एक विकेट लिए।
त्यसपछि आफ्नो पहिलो इनिङको व्याटिङ् थालेको पुलिसले पहिलो दिन १ सय ३ रन बनाएको छ।पहिलो दिनको खेल सकिनुअघि पुलिसले २४ ओभर खेल्दै ७ विकेटको क्षतिमा १ सय ३ रन बनाएको हो। पुलिसका लागि ३४ रन बनाएका गुल्शन झा र १ रन बनाएका प्रेम तमाङ क्रिजमा अविजित छन्। त्यसबाहेक पुलिसका लागि अमित श्रेष्ठले १८ , रसिद खानले १६, शंकर राना १३ र दिलिप नाथले १० रनमात्रै जोडे। कुशल भुर्तेल र अर्जुन साउद भने शून्य रनमै आउट हुन पुगे।
बलिङतर्फ आर्मीका साहब आलम एक्लैले ५ विकेट लिए। ११ ओभर बलिङ गरेका आमलमले ५५ रन खर्चिएर ५ विकेट लिएका हुन्। त्यस्तै सोमपाल कामी र पवन कार्कीले मान एक–एक विकेट लिए। सोमबार दोस्रो दिनको खेल पुलिसले १ सय ४ बाट सुरु गर्नेछ। आइतबार प्रतियोगिताको उद्घाटन वीरगन्ज महानगरपालिकाका मेयर राजेशमान सिंहले गरेका थिए।
रेड बल र ह्वाइट जर्सीको प्रयोग भइरहेको दुई दिवसीय जय ट्रफी एलिट कप माघ ३ गतेसम्म चल्नेछ। यस प्रतियोगितामा गत वर्ष सम्पन्न प्रधानमन्त्री कप(पिएम कप) राष्ट्रिय क्रिकेट प्रतियोगितामा शीर्ष चारमा रहेका नेपाल पुलिस क्लब, त्रिभुवन आर्मी क्लब, बागमती प्रदेश र मधेस प्रदेशले प्रतिस्पर्धा गरिरहेका छन्।
सिंगल राउण्ड रोबिनका ६ खेलपछि शीर्ष दुई टोलीबीच माघ ३ गते फाइनल खेल हुनेछ। लिग चरणका खेल दुई दिवसीय हुनेछ भने फाइनल खेल तीन दिवसीय हुने पर्सा क्रिकेट संघका अध्यक्ष मनिष सिंहले जानकारी दिए।
प्रतिक्रिया दिनुहोस !
