बेरुजु घटाउन इलामको सन्दकपुर गाउँपालिका, देउमाई नगरपालिका, रोङ गाउँपालिका, इलाम नगरपालिका, फाकफोकथुम गाउँपालिका तथा माईजोगमाई गाउँपालिकाले योगदान गरेका छन्।
इलाम : महालेखापरीक्षणको कार्यालयले बुधबार सार्वजनिक गरेको वित्तीय लेखापरीक्षणको ६२औं प्रतिवेदनले इलामको सन्दकपुर गाउँपालिका जिल्लाका १० स्थानीय तहमध्ये कम बेरुजु भएको पालिकामा परेको देखाएको छ ।
गत वर्षको भन्दा ९२ दशमलव ५ प्रतिशत कम बेरुजु देखिएको सन्दकपुर गाउँपालिकाको टाउकोमा यस वर्ष ४२ लाख ५८ हजार मात्र बेरुजु देखिएको छ । सो पालिकामा गत वर्ष ५ करोड ७२ लाख २८ हजार बेरुजु रहेको थियो ।
सन्दकपुर गाउँपालिका प्रमुख प्रशासकीय अधिकृत यादव राउतका अनुसार पालिकामा अहिले देखिएको बेरुजु नियमित गर्नुपर्ने बेरुजु मात्रै हो । उनले भने ‘यो सबै कार्यपालिकाले निर्णय गर्दा सकिन्छ ।’ उनले ऐन, नियम, निर्देशीकाको पालन गरेर विधि अनुसार काम गर्दा बेरुजु नियन्त्रण गर्न सकिने बताए ।
इलामको मालपोत कार्यालयमा बस्दा मालपोत कार्यालयको सुधारका लागि महत्वपूर्ण काम गरेको उनले जिल्ला प्रशासन कार्यालयमा पनि ‘सरकारी अड्डा’लाई ‘जनमैत्री’ बनाउने प्रयास गरेका थिए । उनले भने ‘मालपोत वा जिल्ला प्रशासनमा एकल निर्णय चल्ने भएपनि यहाँ समन्वय र सहकार्यले भूमिका खेल्दो रहेछ ।’
उनले २०७४ देखिको पालिकाको करिब १६ करोड बेरुजु पनि आधाभन्दा बढी घटाएको जानकारी दिए । उनले भने ‘कर्मचारी र जनप्रतिनिधिको सकारात्मक प्रयास भएमा बेरुजु शून्य बनाउन सकिने रहेछ ।’
इलामको बेरुजु ३९ प्रतिशतले घट्यो
इलामका स्थानीय तहको बेरुजु गत वर्षको भन्दा ३९ दशमलब ६७ प्रतिशतले बेरुजु घटेको छ । बेरुजु घटाउन इलामको सन्दकपुर गाउँपालिका, देउमाई नगरपालिका, रोङ गाउँपालिका, इलाम नगरपालिका, फाकफोकथुम गाउँपालिका, माईजोगमाई गाउँपालिकाले योगदान गरेका छन् ।
इलामको मांसेबुङ गाउँपालिकाले गत वर्षको भन्दा यस वर्ष ५२५ प्रतिशत बढी बेरुजु आर्जन गरेको छ । गत वर्ष ४० लाख ७४ हजार बेरुजु रहेको गाउँपालिकामा यस वर्ष २ करोड ५४ लाख ६४ हजार बेरुजु देखिएको छ । इलामको सूर्योदय नगरपालिका गत वर्षको तुलनामा यस वर्ष बेरुजुको बोझ बोक्ने दोस्रो पालिका बनेको छ । गत वर्ष १७ लाख ७१ हजार बेरुजु भएको सूर्योदय नगरपालिकाको यस वर्ष ६१ लख ७९ हजार बेरुजु देखिएको छ ।
यसैगरी माई नगरपालिकाले गत वर्षको भन्दा १७७ प्रतिशत बेरुजु थपेको छ । गत आर्थिक वर्ष २ करोड ३४ लाख २५ हजार बेरुजु देखिएको माई नगरपालिकामा यस वर्ष ६ करोड ४९ लाख ७९ हजार बेरुजु देखिएको छ । माई नगरपालिका जिल्लामै सबै भन्दा बढी बेरुजु देखिएको नगरपालिका हो ।
यसैगरी चुलाचुली गाउँपालिकाको गत वर्षको भन्दा ७१ प्रतिशत बढी बेरुजु देखिएको छ । गतवर्ष १ करोड ४१ लाख १४ हजार बेरुजु देखिएको चुलाचुलीमा यस वर्ष २ करोड ४१ लाख ४४ हजार वेरुजु देखिएको छ । सन्दकपुर गाउँपालिका पछि माईजोगमाई गाउँपालिकाले गत वर्षको भन्दा ९२ दशमलव २९ प्रतिशत बेरुजु घटाएको छ । यस वर्ष माईजोगमाईको बेरुजु ८३ लाख ६ हजार छ । गत वर्ष १० करोड ७८ लाख ४८ हजार बेरुजु थियो । इलाम नगरपालिकाले पनि गत वर्षको तुलनामा ५१ दशमलव ४४ प्रतिशत कम बेरुजु आर्जन गरेको छ । गत वर्ष ६ करोड ९६ हजार बेरुजु देखिएको इलामको पुरानो नगरपालिकामा यस वर्ष २ करोड ९१ लख ८० हजार बेरुजु देखिएको छ ।
कृषि र आर्थिक विकासमा प्रयास गरिरहेको रोङ गाउँपालिकाले पनि गत वर्षको भन्दा ५० प्रतिशत कम बेरुजु आर्जन गरेको छ । गत वर्ष रोङ गाउपालिकाको बेरुजु ५ करोड ४० लाख ८७ हजार बेरुजु थियो । यस वर्ष २ करोड ७२ लाख ९१ हजार बेरुजु देखिएको छ । इलामको देउमाई नगरपालिकाले पनि यस वर्ष ३२ दशमलव ३६ प्रतिशत बेरुजु घटाएको छ । गत वर्ष २ करोड ५२ लाख ९६ हजार बेरुजु रहेको देउमाई नगरपालिकाको यस वर्ष १ करोड ७१ लख ८ हजार बेरुजु देखिएको छ ।
फााकफोकथुम गाउँपालिकाले पनि गत वर्षको भन्दा २७ दशमलव ६८ प्रतिशतले बेरुजु घटाएको छ । गत वर्ष २ करोड ४९ लाख ९६ हजार बेरुजु देखिएको फाकफोकथुममा यस वर्ष १ करोड ८० लाख ७६ हजार बेरुजु देखिएको छ ।
इलामका स्थानीय तहको कुल बेरुजु २२ करोड ४९ लाख ८५ हजार रहेको छ । यो गत वर्षको भन्दा ३९ दशमलब ६७ प्रतिशतले कमी हो । गत बर्ष इलामका स्थानीय तहको कुल बेरुजु ३७ करोड २९ लाख ३४ हजार थियो ।
प्रतिक्रिया दिनुहोस !
