काठमाडौंः युरोकप फुटबल प्रतियोगिता अन्तरगत आइतबार बिहान भएको खेलमा अस्ट्रियासँग गोलरहित बराबरी खेलेपछि पोर्चुगल अफ्ठेरोमा परेको छ ।
समूह ‘एफ’ मा रहेको पोर्चुगल आइसल्यान्डविरद्धको पहिलो खेलमा १–१ गोलको बराबरीमा रोकिएको अवस्थामा दोस्रो खेलमा जित निकाल्ने लक्ष्यका साथ मैदानमा उत्रेका थियो ।
तर, उसका विश्वचर्चित स्ट्राइकर क्रिस्टियानो रोनाल्डोले अस्ट्रियाविरुद्ध पनि कुनै जादु चलाउन सकेनन् । अस्ट्रियाविरुद्धको पेनाल्टी पनि उनले गोलमा परिणत गर्न सकेनन् ।
खेलमा अधिकांश समय बल आफ्नो नियन्त्रणमा राखेको पोर्चुगलका लागि पहिलो हाफको २९ औं मिनेटमा नानीले प्रहार गरेको बल पोस्टमा लाग्दै फर्केको थियो ।
दोस्रो हाफको ७९ औं मिनेटमा अस्ट्रियाको पोस्ट्मा आफैंलाई लडाएपछि पाएको पेनाल्टी पोस्ट् लाग्दै फर्किएको थियो । फर्किएको बललाई रोनाल्डोले नै प्रहार गरे पनि पोस्ट्माथिबाट बाहिरियो ।
पहिलो खेलमा आइसल्यान्डले अन्तिम समयमा गोल गरेर खुसी मनाउँदा रिसाएका रोनाल्डोले अस्ट्रियाविरुद्ध पनि जित निकाल्न नसकेपछि पोर्चुगललाई अन्तिम १६ मा पुग्न समूहको शीर्ष स्थानमा रहेको हंगेरीविरुद्ध जित निकाल्नै पर्ने बाध्यता छ ।
दुई खेलमा बराबरी खेलेर २ अंक जोडेको पोर्चुगलले अब समूह चरणको अन्तिम खेलमा हंगेरीविरुद्ध खेल्नुपर्ने छ । अस्ट्रियालाई हराएको हंगेरीले आइसल्यान्डसँग बराबरी खेलेको थियो ।
हंगेरी चार अंकसहित शीर्षस्थानमा रहेको छ भने आइसल्यान्ड र पोर्चुगलको समान दुई अंक छ । अस्ट्रियाले भने एक अंकमात्रै जोडेको छ ।
प्रतिक्रिया दिनुहोस !
