बेइजिङः संयुक्त राज्य अमेरिकाले आफू स्वतन्त्र तिब्बतको पक्षमा समर्थन नगर्ने जानकारी दिएको छ । अमेरिकी विदेशमन्त्री जोन केरीले तिब्बतलाई चीनको अभिन्न अंग मानेको भन्दै यस्तो जानकारी दिएका हुन् ।
तिब्बती आध्यात्मिक गुरु दलाई लामाले अमेरिकी राष्ट्रपति बाराक ओबामालाई ह्वाइट हाउसमा भेटेलगत्तै अमेरिकाको यस्तो भनाइ आएको छ । दलाई लामालाई अमेरिकी राष्ट्रपतिले भेटेको विषयलाई लिएर चीनले असन्तुष्टि व्यक्त गरेको थियो । चीनको असन्तुष्टि आएलगत्तै अमेरिकाले यस्तो धारणा व्यक्त गरेको हो ।
अमेरिकी विदेशमन्त्री केरीले शनिबार चीनका विदेशमन्त्री वाङ यीलाई फोनमा बताएको जनाइएको छ । केरीले तिब्बत सम्बन्धमा अमेरिका सधैं एक चीनको पक्षमा रहेको चीनको भनाइ छ ।
अमेरिकाले ओबामा र दलाई लामाको भेट द्विपक्षीय नभएको र यो कुनै आधिकारिक तहको नभएको भन्दै चीनलाई गम्भीर रूपमा नलिन आग्रह गरेको छ । बाराक ओबामा र दलाई लामा दुवै नोबेल शान्ति विजेता भएका हुनाले उनीहरूको वार्ता भएको र यो व्यक्तिगत भेट भएको केरीले उल्लेख गरेका छन् ।
विदेशमन्त्री वाङले फोनवार्ताका क्रममा अमेरिकाले तिब्बतप्रतिको आफ्नो नीति स्पष्ट पार्नुपर्नेमा जोड दिएका थिए । उनले चीनको आन्तरिक मामिलामा अमेरिकाले हस्तक्षेप गर्न नहुने बताएका थिए ।
अमेरिकाले चीनसँगको सम्बन्धमा व्यावहारिक नीति अपनाउनुपर्ने वाङले जिकिर गरेका थिए । दलाई लामाले पनि ओबामासँगको भेटमा आफूले स्वतन्त्र तिब्बतको माग नगरेको बताएका थिए । त्यसका लागि चीनसँग छिटै वार्ता हुने उनले जानकारी दिएका थिए ।
केरीले यसै महिनाको सुरुवातमा बेइजिङमा आयोजित अमेरिका–चीन रणनीतिक एवं आर्थिक संवाद सफल भएको भन्दै प्रशंसा गरेका थिए । केरीलाई उद्धृत गर्दै चीन सरकारले अमेरिका चीनसँगको सम्बन्ध सुदृढ बनाउन तयार भएको जानकारी दिएको छ । वाङले केरीसँगको वार्ता सफल भएको बताएका छन् ।
प्रतिक्रिया दिनुहोस !
