अन्नपूर्णः पूर्वप्रधानमन्त्री डा. बाबुराम भट्टराईले पार्टीका रूपमा घोषणा गरेको ‘नयाँ शक्ति'को चर्चा जारी छ । उसो त हरेक पल हरेक चिज नयाँ हुन्छ संसारमा । जन्म नयाँ हुन्छ । विचार नयाँ फुर्छ ।
मृत्यु नयाँ हुन्छ । बिहान नयाँ उदाउँछ । पहल नयाँ हुन्छ । विवाद नयाँ र समाधान पनि नयाँ हुन्छ । आफ्ना अनुभवमा केन्द्रित भएर लेखक डा. राजेन्द्र केसीले ‘वैकल्पिक शक्ति' नामक नयाँ किताव बजारमा ल्याएका छन् ।
मान्छेले स्वयंलाई कसरी बदल्न सक्छ ? उसभित्र कति सम्भावना छन् ? र त्यो गर्न कसरी शक्ति आर्जन गर्न सकिन्छ? यिनै विषयलाई लेखक केसीले मिहिन ढंगले किताबमा केलाएका छन् ।
प्रकाशक संस्था घोस्ट राइटिङका अध्यक्ष कमल ढकाल त पुस्तकलाई मानिसले आफूमा भएको वैकल्पिक शक्ति उजागर गर्नसक्ने साँचो हो भन्न पछि पर्दैनन् । किताब स्वैरकल्पनाभन्दा अलि पर यथार्थमा लेखिएको छ । मानिसको व्यावहारिक जीवनमा आवश्यक पर्ने विषयवस्तुलाई सूत्रका रूपमा लेखकले राम्ररी केलाएका छन् ।
तीन अध्यायमा विभाजन गरिएको किताबको सुरुमा आफ्ना अनुभवपछि लेखकले पहिलो अध्यायलाई विचार भनेर विभाजन गरेका छन्; जहाँ नयाँ के हो ?
शक्तिको परिभाषा, आर्थिक समृद्धि, शक्तिका स्रोतहरू के हुन् भनेर केलाएका छन् । अध्याय दुईमा उनले व्यवहारको बयान विभिन्न शीर्षकमा गरेका छन् । असल व्यवहार, बानी परिवर्तनका विभिन्न सूत्रदेखि सम्बन्धको अर्थ र महत्वलाई सविस्तार गरेका छन् ।
जीवनमा सफलता चुम्न चाहनेका लागि ‘वैकल्पिक शक्ति' एक मार्गदर्शन बन्नसक्ने सजिलै अनुमान गर्न सकिन्छ । उनले सफलताका सूत्रमात्रै नपस्केर त्यसका लागि सकारात्मक सोच, स्वाभिमान, सफल मानिसका बानी र सोचहरूलाई पनि प्रेरक रूपमा पस्केका छन् ।
सोच, सपना र योजनाले मात्रै कहीँ पुगिँदैन भन्ने कुरा उनको किताबले राम्ररी पुष्टि गर्दै लगेको लाग्छ । यसका लागि उनले अध्याय तीनमा व्यवस्थापनको बयान गरेका छन् ।
मानिसले समयदेखि, सम्बन्ध, पैसादेखि पुँजीको व्यवस्थापन गर्न सकेन भने सफल भइँदैन भन्ने कुरा उनले पुष्टि गरेका छन् ।
विश्वग्राम बन्दै गएको अहिलेको अवस्थामा व्यवस्थापकीय नेतृत्व सबल र सफल नभएकै कारण २००७ साल, २०१६, ०३६, ०४६, २०५२ र २०६३ मा नयाँ विचार र नयाँ परिवर्तन भएको उल्लेख गरेका छन् ।
आफैं पनि बाबुरामको नयाँ शक्ति नजिक भएकाले पनि उनले अहिलेको नयाँ शक्ति पनि समयको उपज भएको पुष्टि गर्न खोजेका छन् ।
राजनीतिक प्रसंगइतर उनले व्यक्ति, संस्था र टिमवर्कमा नयाँ ऊर्जा कसरी हासिल गर्न सकिन्छ भन्ने एउटा गतिलो खुराक पस्कन सकेको मान्नुपर्छ ।
४८ शीर्षकमा बाँडिएका हरेक लेख पढिरहँदा समय बर्बाद गरेझैं लाग्दैन । १९६ पृष्ठको ‘वैकल्पिक शक्ति' घोस्ट राईटिङ नेपालले प्रकाशन गरेको हो । पुस्तकको मूल्य तीन सय रुपैयाँ कायम गरिएको छ ।
प्रतिक्रिया दिनुहोस !
