प्रेम आचार्य
अर्घाखाँचीः नेपालका उपप्रधानमन्त्री र भारतका राजदूतमा कसको मर्यादा माथि होला ? सर्वसाधारणले सजिलै सहसचिवस्तरका भारतीय राजदूत भन्दा नेपालकै उपप्रधानमन्त्री ठूला भन्ने उत्तर दिन्छन् ।
तर, अर्घाखाँचीमा उपप्रधानमन्त्री टोपबहादुर रायमाझीको भन्दा भारतीय राजदूत रणजित रेलाई को मर्यादाक्रममा माथि राखेर शिलालेख बनाइएपछि विरोध शुरु भएको छ ।
भारतीय राजदुतावासको सहयोगमा निर्माण भएका जिल्लाका तीन विद्यालयका शिलालेखमा उपप्रम भन्दा राजदूतको नाम माथि राखिएपछि अनौठो विवाद शुरु भएको हो ।
अच्चमको कुरा उपप्रधानमन्त्री टोपबहादुर रायमाझी आफैँ कार्यक्रममा उपस्थित भएर विद्यालय भवन र शिलालेखको उद्घाटन गर्दा समेत कुनै प्रतिकिया जनाएका छैनन् । 
सन्धिखर्कको चुत्राबेँसी जनज्योती उच्च मावि, बागीको शान्ति उच्च माबि र अर्घाको अर्घा रजस्थल माविमा निर्माण भएका भवनहरुको शिलालेख राजदूत रेलाई माथि र उपप्रधानमन्त्री रायमाझीलाई तल राखेर निर्माण गरिएपछि विद्यार्थीहरुले कालो पोतिदिएका छन् ।
कार्यक्रममा उपप्रधान मन्त्री टोपबहादुर रायमाझी र भातीय राजदूत रे मात्र थिएनन् । प्रमुख जिल्ला अधिकारी सुरेन्द्र पौडेल, स्थानीय विकास अधिकारी लक्ष्मी पाण्डे गौतम र जिल्ला शिक्षा अधिकारी सुरेन्द्रराज पराजुली लगायतका सरकारी कार्यलयका कर्मचारीको समेत उपस्थिति रहेको थियो ।
सरकारी कार्यलयका प्रमुख मात्र नभइ नेपाली कांग्रेसका सभापति बिष्णु खनाल मुस्कान, एमालेका कार्यवाहक अध्यक्ष जीबनारायण कोइराला, माओवादी केन्द्रका केन्द्रीय सदस्य ठाकुर बिक र राष्ट्रिय जनमोर्चाका जिल्ला सचिव गोपाल पौडेल लगायतका राजनीतिक दलका नेताहरुको उपस्थिति थियो ।
कार्यक्रममा उपस्थित कसैले पनि आफ्नै देसका उपप्रधानमन्त्रीको मर्यादाबारेमा प्रश्न उठाउन सकेनन् । राजदूत र उपप्रधानमन्त्रीसँगै सबै कार्यक्रममा हिँडे । तर मर्यादाको विषय कसैले उठाएनन् ।
अहिले जिल्लामा यही बिषयले चर्चा पाएको छ । जनज्योती उच्च माविका विद्यार्थीले गाएको स्वागत गीत भारतपरस्त भयो भनेर भन्नेहरुले पनि उपप्रधानमन्त्रीको मर्यादाको बारेमा बोलेनन् ।
शनिबार बागीको शान्ति उच्च मावि र आइतबार सन्धिखर्कको जनज्योति उच्च माबि र अर्घाको अर्घा रजस्थल माविको भवन शिलान्यास भएको थियो ।
उपप्रधान मन्त्रीको मर्यादा विपरित भएको भनेर विद्यार्थी संगठनहरुले जनज्योति उच्च माविमा निर्माण भएको भवन शिलालेखमा कालोपोतिएको नेबिसंघका जिल्ला अध्यक्ष युबराज पाण्डेले बताए ।
जिल्लामा कृयाशिल विद्यार्थी संगठनहरु नेविसंघ, अखिल, अखिल क्रान्तीकारी, अखिल छैटौँ र अखिल (विपल्प) समूहले विद्यालयमा तालाबन्दी गरस् कालो पोतेका हुन ।
विद्यार्थी संगठनले तत्काल शिलालेख सच्चाउन माग गरेको अखिलका जिल्ला अध्यक्ष प्रदीप नेपालीले बताए ।
प्रतिक्रिया दिनुहोस !
