चलचित्र पशुपतिप्रसाद उत्कृष्ट

काठमाडौं: चलचित्र ‘पशुपतिप्रसाद'ले उत्कृष्ट चलचित्रअन्तर्गत ‘फान अवार्ड' हात पारेको छ । शनिबार राजधानीमा नेपाल चलचित्र कलाकार संघले प्रदान गरेको अवार्डमा उत्कृष्ट निर्देशक र कथाकारसमेत पशुपतिप्रसादकै निर्देशक दीपेन्द्र के खनाल घोषित भए । पशुपतिप्रसादबाटै विपिन कार्कीले उत्कृष्ट खलपात्रको अवार्ड हात पारे ।

२४ विधामा गरिएको अवार्डमा अभिनेता आर्यन सिग्देल र अभिनेत्री नम्रता श्रेष्ठले उत्कृष्ट अभिनेता र अभिनेत्रीतर्फको उत्कृष्ट अवार्ड पाएका छन् । दुवैले चलचित्र क्लासिकमार्फत अवार्ड जितेका हुन् ।

कार्यक्रममा उद्घोषण गर्दागर्दै हास्यकलाकार विल्सन विक्रम राई अचम्भित भए । उनले उत्कृष्ट हास्य कलाकारको अवार्ड पाउनेमा आफ्नै नाम उच्चारण गर्नुप¥यो । राईलाई चलचित्र अर्धकट्टीबाट अवार्ड प्राप्त भएको हो । कलाकार जितु नेपाल पनि अचम्ममा परे ।

उनले उद्घोषणकै क्रममा उत्कृष्ट सहअभिनेताको अवार्ड पाउनेमा आफ्नै नाम पढ्नु प¥यो । जितुले वडा नम्बर ६ बाट अवार्ड पाएका हुन् । विल्सनको हास्यव्यंग्यले कार्यक्रममा उत्साह थपेको थियो ।

धेरै अवार्ड हात पार्ने अर्को चलचित्रमा ‘क्लासिक' रह्यो । उत्कृष्ट अभिनेता, अभिनेत्रीसँगै सहअभिनेत्रीको अवार्ड चलचित्र क्लासिकबाटै रोमी घिमिरेले पाइन् । चलचित्र क्लासिकबाटै उत्कृष्ट सम्पादकको अवार्ड सुरेन्द्र पौडेलले पाए।

नवअभिनेताको अवार्ड चलचित्र ‘नाइँ नभन्नु ल ३'बाट पल शाहले पाए । उत्कृष्ट नवअभिनेत्रीको अवार्ड चलचित्र ‘ड्रिम्स'की साम्राज्ञीराज्यलक्ष्मी शाहले हात पारिन् । पहिलो चलचित्रबाटै पहिलो अवार्ड पाएकी साम्राज्ञीले भावुक हुँदै अवार्ड थाप्न आमालाई सँगै मञ्चमा लगेकी थिइन् ।

उत्कृष्ट चरित्र अभिनेत्रीमा चलचित्र ‘प्रेमगीत'बाट लक्ष्मी गिरी र चरित्र अभिनेतामा चलचित्र ‘भाग सानी भाग'बाट रमेश बुढाथोकीले पाए । उत्कृष्ट संगीतकारको अवार्ड चलचित्र ‘वडा नम्बर ६'को गीत सुर्के थैलीबाट राजनराज शिवाकोटीले हात पारे ।

शंकर बीसीले उत्कृष्ट नृत्य निर्देशकको अवार्ड पाए । उत्कृष्ट संवादमा चलचित्र वडा नम्बर ६ बाटै दीपकराज गिरीले अवार्ड हात थापेका थिए । उत्कृष्ट पटकथातर्फको अवार्ड चलचित्र ‘कबड्डी कबड्डी'बाट रामबाबु गुरुङ र उपेन्द्र सुब्बाले पाए । उत्कृष्ट द्वन्द्व निर्देशकको अवार्ड चलचित्र ‘भैरब'बाट हिमाल केसीले हात पारे ।

उत्कृष्ट गायक गायिकातर्फको फान अवार्ड युवराज चौलागाईं र अञ्जु पन्तले पाए । चलचित्र प्रेमगीतको ‘म त अलपत्रै परेँ' गीतका लागि डाक्टर कृष्णहरि बरालले उत्कृष्ट गीतकारको अवार्ड हात पारे ।

चलचित्र ‘फन्को'बाट सौगाम मल्लले जुरी अवार्ड पाए । अवार्ड कार्यक्रमको बीचमा अशिष्मा नकर्मी, वर्षा राउत, शंकर बीसीलगायतका कालाकर्मीले नृत्य प्रस्तुत गरेका थिए ।

रिमाललाई लाइफटाइम अचिभमेन्ट
नेपाल चलचित्र कलाकार संघले गायक, अभिनेता तथा चलचित्र निर्देशक हरिप्रसाद रिमाललाई लाइफटाइम अचिभमेन्ट अवार्ड प्रदान गरेको छ । उनलाई एक लाख ११ हजार एक सय ११ रुपैयाँ नगदसहित सम्मान गरिएको हो ।

रेडियो नेपालमा पहिलो गीत गाएका हरिप्रसाद रिमालको बहुप्रतिभालाई सम्मान गर्दै लाइफटाइम अचिभमेन्ट अवार्ड प्रदान गरिएको हो । कार्यक्रममा स्टार अफ द डिकेड अवार्डले अभिनेता राजेश हमाल र अभिनेत्री रेखा थापालाई सम्मान गरिएको थियो । स्टार अफ द इयर अवार्ड अभिनेता अनमोल केसीलाई प्रदान गरिएको छ ।