म प्यार बेचिदिन्छु, बहार बेचिदिन्छु...
‘म प्यार बेचिदिन्छु, बहार बेचिदिन्छु...' बोलको गीत जब स्टेजमा गुञ्जियो, एउटै खुट्टाको सहारामा छमछमी नाचेर नीलम ढुंगानाले दर्शकको ध्यान आफूतिर तानिन् ।
युवाहरूकै बाक्लो उपस्थिति रहेको कार्यक्रममा नीलमले ‘रेली खोला बगर', ‘वनमा फुल्यो फूल'लगायतका गीतमा नृत्य गरेकी थिइन् । एउटामात्रै खुट्टाको सहारामा नाच्दै गरेकी नीलम भूकम्पले नोक्सान गरेको विद्यालय पुनर्निर्माण अभियानमा साथ दिन यसरी नाचिरहेकी थिइन् ।
‘शिक्षाका लागि संगीत' उद्देश्यका साथ सिनामंगलस्थित ‘मिर्मिरे युवा समाज'ले शनिबार राजधानीमा आयोजना गरेको कार्यक्रममा सयौं युवाको उपस्थिति थियो ।
कार्यक्रममा १९७४ एडीका गायक एड्रिन प्रधानको गीतमा युवाहरू झुमेका थिए । अहिलेका चर्चित गायिका मिलन अमात्यले पनि गीतमा दर्शक नचाएका थिए । लोकगायनतर्फ रोज मोक्तानको गीतमा सहभागीहरू रमाएका थिए । नेपालमा गितारका बादशाह भनेर चिनिने अनिल शाहीले पूर्व र पश्चिमा फ्युजन धुनले दर्शकलाई मनोरञ्जन दिएका थिए ।
काभ्रेको होक्से गाविसस्थित जनता उच्च माविको भवन पुनर्निर्माणका लागि सांगीतिक कार्यक्रम आयोजना गरिएको मिर्मिरे युवा समाजका अध्यक्ष राजीव थापाले बताए । जनता मावि ६३ वर्षपहिला स्थापना भएको थियो । पाँच सय ५० जना विद्यार्थी अध्ययनरत विद्यालय भूकम्पले भत्काएको थियो । सोही विद्यालय पुनर्निर्माणका लागि कार्यक्रम आयोजना भएको हो ।
जनता माविका शिक्षक बुद्धिमान तामाङका अनुसार विद्यालयलाई कलेज तहसम्म पुर्याउने लक्ष्यका साथ काम भइरहेका बेला भूकम्पले क्षति पुर्याएको थियो । दुई करोड रुपैयाँको लागतमा बनाइएको भवन क्षति भएको अवस्थामा युवाबाट यस्ता सकारात्मक सोच र सहयोगले खुसी लागेको उनले बताए ।
कार्यक्रममा प्रमुख अतिथि लोकसेवा आयोगका अध्यक्ष उमेशप्रसाद मैनालीले युवा अगाडि नसरेसम्म देशको विकास नहुने बताए । उनले शिक्षा क्षेत्रमा केही गरौं भन्ने उद्देश्यले मिर्मिरे युवा समाजले कार्यक्रम आयोजना गर्नु ठूलो कुरा भएको बताए ।
प्रतिक्रिया दिनुहोस !
