गोरखामा पहिरोले पुरिएर एक बालकसहित तीनको मृत्यु
शिवप्रसाद उप्रेती
गोरखाः गोरखाको केरौँजा गाविसमा बाटो पन्छाउने क्रममा पहिरोले पुरिएर तीनजनाको मृत्यु भएको छ । केरौँजा गाविस ३ को केरौँजाबेसीबाट माछाखोला जाने बाटो पन्छाउने क्रममा पुरिएका ६ जनामध्ये तीन जनाको मृत्यु भएको हो ।
पहिरोमा परी केरौँजा ३ की ४५ वर्षीया कान्छीमाया गुरुङ, ३० वर्षीया चीनमाया गुरुङ र १५ वर्षका सन्देश घलेको मृत शरीर निकालेको जिल्ला प्रहरी कार्यालय गोरखाका एसपी जनकराज पाण्डेले जानकारी दिए ।
उद्धार गरिएका ३ को माछाखोला स्वास्थ्य चौकीमा उपचार भइरहेको छ । उद्धार गरिएका मध्ये केरौँजा ४ का ४० वर्षीय रामजीत गुरुङ (टुंगे) र सोही स्थानका ४० वर्षीय कृष्ण गुरुङ (उकाल)को अवस्था सामान्य छ भने केरौँजा ३ का १२ वर्षीय शुकराम गुरुङको अवस्था गम्भीर छ ।
घाइतेको उद्धारका लागि नेपाली सेनाको हेलिकोप्टर काठमाडौँबाट उडिसकेको प्रमुख जिल्ला अधिकारी नारायणप्रसाद भट्टले जानकारी दिए ।
स्थानीयन सुकबहादुर गुरुङका अनुसार खाना खाएर बाटो बनाउन गएका ६ जना बिहान ११ बजे पहिरोमा पुरिएका हुन् । गुरुङले भने, ‘पहिरो रोकियो भनेर बाटो बनाउन गएका थिए फेरी पहिरो आएर छोप्यो ।'
अघिल्लो हप्ता मंगलबार गएको पहिरोले केरौँजाबेसीका ३८ परिवार विस्थापित भएका थिए । पहिरो रोकिएपछि बाटो खुलाउन गएका स्थानीयबासी बाटो खुलाउने क्रममा पुनः पहिरोले पुरिएका हुन् । पहिरो रोकिएपछि केरौजाबासी घर फर्किसकेका थिए ।
प्रतिक्रिया दिनुहोस !
