स्कुटर दुर्घटनामा महिलाको मृत्यु
विराटनगर: पूर्वपश्चिम राजमार्ग अन्तर्गत मोरङको उर्लाबारी १ मा मंगलबार बिहान भएको दुर्घटनामा परेर एक जना स्कुटर चालक महिलाको मृत्यु भएको छ। एक युवती घाइते भएकी छन्।
विहान ११:३० बजे भएको दुर्घटनामा परेर पथरीशनिश्चरे नगरपालिका २ की ४० वर्षीय कविता धिमालको मृत्यु भएको इलाका प्रहरी कार्यालय उर्लाबारीका प्रहरी निरीक्षक राजकुमार राईले बताए।
दुर्घटनामा परेर गम्भीर घाइते भएकी उनको उर्लाबारी अरनीको अस्पतालमा उपचारका क्रममा ११:४५ बजे मृत्यु भएको राईले बताए। दुर्घटनामा परेर स्कुटरको पछाडि सवार कविताकी छोरी १७ वर्षीय अनिशा गम्भीर घाइते भएकी छन्। अनिशाको उर्लाबारीमै उपचार भइरहेको छ।
उर्लाबारी १ स्थित सत्यसाई पेट्रोल पम्प नजिकै पूर्वबाट पश्चिमतर्फ गइरहेको धिमालले चलाएको को ४ प ४७४३ नम्बरको स्कुटरलाई सोही दिशातर्फ गइरहेको बा ४७ प ३९३४ नम्बरको मोटरसाइकलले ठक्कर दिँदा दुर्घटना भएको जानकारी प्रनि राईले दिए।
ठक्कर दिने मोटरसाइकल र त्यसका चालकलाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ।
प्रतिक्रिया दिनुहोस !
