केरौंजाका घाइतेको सेनाको हेलिकोप्टरद्वारा उद्धार
शिवप्रसाद उप्रेती
गोरखाः केरौंजाको पहिरोमा परी घाइते भएका तीन जनालाई उद्धार गरिएको छ । केरौंजा ३ का सुकराम घले, टुंगे भनिने रामजीत गुरुङ र उकाल भनिने कृष्ण गुरुङलाई नेपाली सेनाको हेलिकोप्टरले उद्धार गरेको हो ।
दिउँसो तीनबजेतिर हेलिकोप्टरबाट काठमाडौं पुर्याइएको प्रमुख जिल्ला अधिकारी नारायण भट्टले जानकारी दिए । ‘सेनाको हेलिकोप्टरबाट काठमाडौं पुर्याएर गृहमन्त्रालयको टिमले अस्पताल लगिसकेको भन्ने जानकारी आएको छ’ उनले भने ।
घाइते तीनै जनालाई माछाखोला स्वास्थ्य चौकीमा सामान्य उपचारपछि काठमाडौँ पठाइएको हो । घाइतेमध्य सुकरामको अबस्था गम्भीर रहेको प्रहरी नायब उपरीक्षक वीरेन्द्र थापाले जनाए ।
बिहान नौ बजेतिर केरौंजाबेशीबाट माछाखोला जाने बाटोको पहिरो पन्छ्याउने क्रममा माथिबाट आएको पहिरोले छ जनालाई पुरेको थियो ।
स्थानीय र माछाखोला चौकीबाट पुगेका प्रहरीको टोलीले तीन जनालाई जीवितै उद्धार गरेको थियो भने बाँकी तीन जनाको शव निकालेको थियो ।
डिएसपी थापाका अनुसार कान्छीमाया गुरुङ, चिनमाया गुरुङ र सन्देश घलेको पहिरोमा परी मृत्यु भएको छ । मृत्यू हुने सन्देश र सिकिस्त घाइते हुने सुकराम एकाघरका दाजुभाइ हुन् ।
घटनास्थल सदरमुकामबाट २२ कोश टाढा पर्छ ।
प्रतिक्रिया दिनुहोस !
