सडक खनिरहेको एक्साभेटरमा आगजनी
बझाङः चैनपुर–दिपायल सडक खण्डको थलारा क्षेत्रमा सडक खनिरहेको एक्साभेटरमा गएराति अज्ञात समूहले आगजनी गरेको छ ।
पाराकाट्ने गाविस महेन्द्रधार ठिङ सडकखण्डमा चालकले साँझ सडकमा राखेर डेरामा सुत्न गएका बेला अज्ञात समूहले आगजनी गरेको हो ।
आगजनीबाट एक्साभेटर पुर्णरुपमा क्षतिग्रस्त भएको छ भने सडकमै राखेको २२ ड्रम डिजेलमा पनि अज्ञात समहले आगो लगाउँदा नष्ट भएको छ ।
‘काम गरेर साँझ हामी डेरातर्फ आयौँ’, साइड ईन्चार्ज अर्जुन खड्काले भने, ‘विहान जाँदा मेसीनसहित सबै जलेर नष्ट भएको देखियो ।
एक्साभेटरमा आगजनी भएको खबर पाएपछि थलारा इलाका प्रहरी कार्यालय र जिल्ला प्रहरी कार्यालयबाट प्रहरीको टोली घटनास्थलमा गएको छ ।
सुदूरपश्चिम क्षेत्रीय सदरमुकाम दिपायल जोड्न एसियाली विकास बैङ्कको आर्थिक सहयोगमा जिल्ला विकास समिति ग्रामिण पुर्वाधार तथा जीविकोपार्जन कार्यक्रम (डिलिप) परियोजनाबाट गत वर्षदेखि खोली दंगाजी क्षेत्रमा सडक काट्ने काम भइरहेको छ ।
उक्त क्षेत्रमा द क्याराभान कन्ट्रक्सन निर्माण कम्पनीले ढुंगा भएको स्थानमा ठेक्का लिएर सडक काट्न मेसीनले काम गर्दै आएको थियो । एक्साभेटर र डिजेलसहित १ करोड २० लाख रुपैयाँ क्षति भएको साइड ईन्चार्ज खड्काले जानकारी दिए ।
जिल्ला प्रहरी कार्यालय बझाङका प्रमुख प्रहरी नायव उपरीक्षक नरेन्द्र चन्दले आगो लगाएको घटना शंकास्पद भएकाले ठाउँ ठाँउमा प्रहरी परिचालन गरेर खोजी भइरहेको बताए ।
प्रतिक्रिया दिनुहोस !
