खतरामाथि पुगेपछि राप्तीमा साइरन बजाइयो
नेपालगन्जः पहाडी क्षेत्रमा परेको वर्षाका कारण राप्तीमा मंगलबार पानी सतह खतराको अवस्थामा पुगेको छ ।
पानीको सतह खतराको सूचक भन्दा माथि पुगेपछि प्रभावित क्षेत्रमा खतराको संकेतस्वरु साइरन बजाइएको प्रमुख जिल्ला अधिकारी रविलाल पन्थले जानकारी दिए ।
उनले पानीको सतह बढेपछि प्रहरीमार्फत स्थानीयबासीलाई सुरक्षित स्थानको खोजी गर्न समेत आग्रह गरिएको बताए ।
कुशुममा रहेको बाढी मापन केन्द्रकागेज रिडर भद्र बहादुर थापाले दिउसो राप्तीमा पानी सतह ५ मिटर भन्दामाथि पुगेको जानकारी दिए ।
उनले मंगलबार विहानबाटै पानीको सहत बढ्न थालेको जानकारी दिए । उनले भने, ‘विहानबाटै पानी सतह बढ्दै गएको थियो । ११ बजेतिर ५.२ मिटर क्रस गरयो ।’
नदीमा पानीको सतह बढेपछि बाँकेको होलिया, फत्तेपुर, विनौना, बैजापुर, बेतहनी, गंगापुर, मटैया, कम्दी र महादेवपुरी गाविसका जनता साइरन बजाएर खतराको जानकारी गराएको छ ।
कुसुमबाट प्रभावित क्षेत्रमा बाढी पुग्न ५-६ घण्टा लाग्छ । प्रमुख जिल्ला अधिकारी पन्थले तत्काल दैवी प्रकोप उद्धार समितिको बैठक बसेर उच्च सर्तकता अपनाइएको बताए । प्रभावित क्षेत्रमा ठूलो संख्यामा सुरक्षाकर्मीलाई तयारी अवस्थामा राखिएको समेत उनले जानकारी दिए ।
उता होलियाका स्थानिय रामकुमार शुक्लाले पानी बढ्दै गएपछि अहिलेसम्म गाउँमा भने पानी नपसेको बताए । उनले साइरन बजाएपनि खतराको अवस्थामा आइन नसकेको बताए ।
भारतले अन्तर्राष्ट्रिय कानुन विपरित बनाएको लक्ष्मणपुर बाँध र कलकलवा तटबन्धका कारण पानीको प्राकृतिव बहाव रोक्दा बर्षेनी नेपाली भूमि डुबानमा पर्दै आएको छ ।