सात लाख तिर्न नसक्दा ‘नक्कली डाक्टर’ जेल पुगे
पोखरा (अन्नपूर्ण): नक्कली कागजातका आधारमा डक्टर बनेको आरोपमा पक्राउ परेका मेरीस्टोप सेन्टर पोखराका डा. महेश्वर राय यादव अदालतले मागेको धरौटी बुझाउन नसकेपछि जेल चलान भएका छन् । उनीसँग कास्की अदालतले सोमबार ७ लाख धरौटी मागेको थियो ।
यादव असार ३ गते पोखराबाटै पक्राउ परेर काठमाडौं पु¥याइएका थिए । प्रहरीको केन्द्रीय अनुसन्धान ब्युरो (सीआईबी) ले यादवलाई पक्रेको थियो ।
थप अनुसन्धानका लागि काठमाडौं अदालतमै पेस गरिएका उनलाई ठगी मुद्दा दायर गर्न भने कास्की ल्याइएको हो । उनीविरुद्ध सीअईबीले नै जिल्ला न्यायाधीवक्ता (सरकारी वकिल)को कार्यालयमार्फत कास्की अदालतमा आइतबार ठगी मुद्दा दर्ता गरेको थियो ।
सोमबार अबेर भएको थुनछेक बहसमा जिल्ला न्यायाधीश शेखर पौडेलको इजलासले धरौटी लिने आदेश गरेको हो । श्र्रेस्तेदार कृष्ण नेपालका अनुसार मागिएको धरौटी बुझाउन नसकेकैले यादव जेल चलान भएका हुन् ।
सोमबार कार्यालयसम्म पनि उनले धरौटी रकम बुझाउन सकेका थिएनन् । आइतबार आदेश हुँदा अबेर भएकाले भने यादव प्रहरी हिरासतमै थिए ।
७ लाख रुपैयाँ धरौटी या त्यस बराबरको जेथा दिन नसके जेल चलान गर्न आदेश न्यायाधीश पौडेलले आदेश गरेका थिए ।
मुलुकी ऐन ठगी महलको १ र २ नम्बर बमोजिम कसुरमा त्यही महलको ४ बमोजिम ५ वर्ष कैद र ५ लाख रुपैयाँ नगद जरिवाना वा दुवै सजाय माग दाबी सहित न्यायाधीवक्ताको कार्यालयले यादवविरुद्ध मुद्दा दायर गरेको थियो ।
सरकारपक्षीय यो मुद्दामा सहायक न्यायाधीवक्ता स्वतन्त्र न्यौपानेले बहस गरेका थिए भने यादवको पक्षबाट अधिवक्ता विनोद रेग्मी र हरिराज पोखरेलले पैरवी गरेका थिए ।
सर्लाही जिल्लाको वसन्तपुर—५ स्थायी घर भएका यादवले भारतको इन्टरमिडियट बोर्डबाट विज्ञान विषयमा प्रवीणता प्रमाणपत्र उत्तीर्ण गरेको सीआईबीको अनुसन्धानबाट पत्ता लागेको थियो । चिकित्साशास्त्र अध्ययन नै नगरी नक्कली प्रमाणपत्रका भरमा डाक्टर बनेर ठगी गरेको भन्दै सीआईबीले पक्रेर मुद्दा चलाएको हो ।
पोखराबाट यादवसहित सीआईबीले देशभरबाट ३६ जनालाई नक्कली डाक्टरको आरोपमा गिरफ्तार गरेको थियो । सीआईबीले मेडिकल काउन्सिल र उच्च माध्यमिक शिक्षा परिषदसँग मिलेर संयुक्त रुपमा अनुसन्धान गरी नक्कली डाक्टरहरु पत्ता लगाएको थियो ।
डक्टर बनेर काम गरिरहेका उनीहरुले मेडिकल काउन्सिलबाट लाइसेन्स लिनुअघि पेस गरेको शैक्षिक प्रमाणपत्र सम्बिन्धित विश्वविद्यालयबाट पुष्टि गर्दा नक्कली सीआईबीले पत्ता लगाएको थियो ।