कांग्रेस नेतालाई हिन्दू धर्मको पाठ पढाउँदै भारतीय नेता
![कांग्रेस नेतालाई हिन्दू धर्मको पाठ पढाउँदै भारतीय नेता](https://annapurnapost.prixacdn.net/media/albums/577bcb0b0b3315.00902483_NSJb4XjkDw.jpg)
काठमाडौँ: भारतीय जनता पार्टीका नेता भगतसिह कोसियारीले नेपाल र भारतबीचको सम्बन्धलाई थप सुमुधुर बनाउनु पर्ने बताएका छन् ।
नेपाल–भारत प्रवुद्ध समुहका बैठकमा सहभागि हुन काठमाडौँ आएका कोसियारीले मंगलबार कांग्रेस तीन नेतासँग भेट गरेका छन् । पूर्वगृहमन्त्री एवम् कांग्रेस नेता गोविन्दराज जोशीको निवास मण्डिखाटारमा भएको भेटमा अर्को नेता कूलबहादुर गुरुङ र विनयध्वज चन्द पनि सहभागि थिए ।
भेटमा कोसियारीले नेपाल र भारतबीच हिन्दुहरुको पवित्र मन्दिरहरु चार धाम समेत दुवै देशमा भएकाले पनि जनस्तरमै सम्बन्ध बलियो बनाउनु पर्ने बताएका थिए ।
‘हिन्दुहरुको चार धाममा पुशपति नाथ नेपालमा छ, यस्तो सम्बन्ध भएका हामी दुई मुलुकबीच बलियो र प्रगाण सम्बन्ध हुनुपर्छ’ कोसियारीको भनाइ उदृत गर्दै जोशीले अन्नपूर्णसँग भने ।
कोसियारीले कांग्रेसभित्र पूर्ण एकता कायम गरेर नेपालको समृद्धिको नेतृत्व गर्न सक्ने धारणा पनि उक्त भेटमा राखेका थिए । ‘कांग्रेसभित्र एकता कामय भएर मुलुकको समग्र विकासमा अघि बढ्दा राम्रो हुने उहाँको सुझाव थियो’ जोशीले भने ।
जोशी निवासमा भएको मिटिङमा कोसियारीले हिन्दु राष्ट्रको महत्वका विषयमा पनि धारणा राखेका थिए । उनले सिधै हिन्दु राज्य कायम गर्नुपर्ने नभने पनि हिन्दु राज्यको महत्वमा लामै व्याख्या गरेको बताइएको छ ।
पछिल्लो समय नेपाल र भारतबीचको सम्बन्धमा केही चिसोपना आएका बेला भारतीय जनता पार्टीले प्रत्येक्ष र अप्रत्येक्ष रुपमा नेपालको धारणा बुझ्न थालेको छ । भारतीय सरकारको नाकाबन्दीले विग्रिएको सम्बन्धमा विजेपी सुधार गर्न इच्छुक देखिएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)