‘युरोकप जर्मनीले जितोस्
बालगोपाल महर्जन
युरोकपमा निकै माथिल्लो स्तरको खेल भइरहेको छ । नाम चलेका टोलीले हार खेपेका छन् । यस पटक वेल्स र आइसल्यान्डले धेरै राम्रो खेल खेले ।
वेल्स सेमिफाइनलमा पुगेकोले उसको प्रदर्शन सबै कोणबाट राम्रो रह्यो । वेल्स सन्तुलित देखिएको छ । निर्धारित समयमै गोल गर्न सक्नु वेल्सको विशेषता हो ।
पोर्चुगलसँग वेल्सलाई अहिले तुलना गर्दा वेल्स नै राम्रो छ । युरोकप अघिसम्म वेल्स नचिनेको र नसुनेको टोली हो । तर छोटो अवधिमै वेल्सले आफूलाई प्रमाणित गरेर देखाएको छ ।
वेल्सको फुटबल खेल्नै शैली पनि राम्रो छ । रक्षापंंक्ति, मिडफिल्ड र स्ट्राइकिङ लाइन सबै उत्कृष्ट देखिन्छ । बल पोसेसन र काउन्टर आक्रमण पनि वेल्सको निकै राम्रो छ ।
मोर्डन फुटबल खेल्ने तरिकालाई वेल्सले राम्रोसँग पछ्याएको जस्तो लाग्छ। पोर्चुगल पनि नराम्रो टोली होइन । तर उसले समूहगत चरणदेखि नै त्यति राम्रो खेलिरहेको छैन ।
सबै खेलको निर्धारित समयमा बराबरी गर्ने र पेनाल्टीमा दबाबबीच जित्ने उसको बानीजस्तै देखियो । सेमिफाइनलमा पोर्चुगललाई त्यति सहज होला जस्तो लाग्दैन ।
अर्को सेमिफाइनल खेल्ने जर्मनी र फ्रान्स दुवै बराबर हैसियतका बलिया टोली हुन् । जर्मन टोलीका स्ट्राइकर मारियो गोमेज घाइते भएकाले केही गाह्रो हुन सक्छ । तर युरोकपमा मलाई मनपर्ने टोली जर्मनी हो । म सानैदेखि जर्मनको समर्थक हुँ ।
जर्मन प्रशिक्षकसँग फुटबल सिकेको र जर्मन सरकारले नेपाली फुटबललाई सहयोग गरेको हिसाबले पनि पहिल्यैदेखि मैले जर्मनलाई समर्थन गरेको छु ।
विश्वकपपछि जर्मनको पेस भने केही घटेको जस्तो देखिन्छ । तर पनि टोलीमा अनुभवी खेलाडीको कमी छैन । विश्वकप जितेको जर्मनीको मनोबल उच्च हुनु स्वाभाविक हो ।
इटालीलाई हराएपछि जर्मनीको सम्भावना बढेको छ । सेमिफाइनलमा जर्मनीले फ्रान्ससँग खेल्नुपर्ने भएकाले नतिजा रहस्यमय हुनेछ । घरेलु मैदान र समर्थकको साथमात्र होइन फ्रान्सले धेरै राम्रो पनि खेलिरहेको छ।
व्यक्तिगत खेलभन्दा पनि फ्रान्सको टिम गेम उच्च स्तरको छ । तर म जर्मनीले जितेको देख्न चाहन्छु । (बालगोपाल राष्ट्रिय फुटबल टोलीका प्रशिक्षक हुन् ।)
प्रतिक्रिया दिनुहोस !
