कानुन आयोगका अध्यक्षद्वारा राजीनामा 

काठमाडौं: कानुनमन्त्रि अग्नि खरेलको कार्यशैलीप्रति असन्तुष्टि जनाउँदै कानुन आयोगका अध्यक्ष उमेशचन्द्र झाले पदबाट राजीनामा दिएका छन् । मन्त्री खरेलमार्फत दिएको राजीनामा मन्त्रिपरिषद्बाट स्वीकृत भएको छ ।

वरिष्ठ अधिवक्ता झा २०६८ पुसमा आयोगको अध्यक्ष नियुक्त भएका थिए । उनले अध्यक्ष हुन गएकोमा पश्चात्ताप पनि गरे । कार्यकाल ६ महिना बाँकी छँदै झाले मन्त्री खरेलसमक्ष अघिल्लो साता राजीनामा दिएका थिए । उनले राजीनामापत्रमा भने बिरामी रहेका कारण पदमा रहन असमर्थ रहेको उल्लेख गरेका छन् ।

आयोगका एक सदस्यले मन्त्री खरेलको कार्यशैलीप्रति असन्तुष्टि प्रमुख कारण रहेको बताए । यसअघि पनि आयोग उपाध्यक्ष प्रचण्डराज प्रधानले आठ महिना कार्यकाल बाँकी छँदै पदबाट राजीनामा दिएका थिए । उक्त स्थानमा तत्कालीन कानुन सचिव भेषराज शर्मा नियुक्त भएका थिए । राजीनामापछि झाले आयोगलाई कानुन मन्त्रालयले काम नदिएर बेकम्मा बनाउन खोजेको भन्दै असन्तुष्टि जनाए ।

 

‘कानुनमन्त्रीसमक्ष दिएको राजिनामा क्याबिनेटबाट स्वीकृत भएको बुधबारमात्रै जानकारी पाएँ,' झाले भने, ‘आयोगलाई कानुनले जुन म्यान्डेट दिएको छ, कानुन मन्त्रालयबाट त्योअनुरूपको व्यवहार भएन । कानुनको ड्राफ्ट पनि जोसुकैले गर्ने स्थिति रह्यो । आयोग त थापनामात्रै भयो । जसले जे गरे पनि भएको छ । यस्तोमा बसेर के काम गर्ने ? मलाई त अध्यक्षमा गएकै पश्चात्ताप भयो ।'

असार १० गतेदेखि लागू हुने गरी झाको राजीनामा स्वीकृत गरिएको छ । आयोगलाई कानुनका मस्यौदाको जिम्मेवारी दिन बारम्बार गरेको आग्रहलाई बेवास्ता गरिएको भन्दै झाले असन्तुष्टि पनि जनाए । भौतिक स्रोत, साधन र जनशक्तिविहीन बनाएर आयोगलाई निकम्मा बनाइएको गुनासो झाको छ । ऐनअनुसार कानुनको तर्जुमा, संहिताकरण, कानुन संशोधन, एकीकरण, पुनरावलोकन तथा कानुन र न्यायसम्बन्धी विषयमा अध्ययनअनुसन्धानको जिम्मेवारी आयोगलाई छ । तर कुनै ‘बिजनेस' नदिएका कारण आयोग पदाधिकारी र कर्मचारीले तलबभत्ता खाने थलोमात्र भएको छ ।

सर्वोच्च अदालतको न्यायाधीश भइसकेका वा हुने योग्यता पुगेका व्यक्तिमध्येबाट पाँच वर्षका लागि आयोग अध्यक्ष नियुक्त हुने कानुनी व्यवस्थाअनुरूप झा अध्यक्षमा नियुक्त भएका थिए । अध्यक्ष र उपाध्यक्षको राजीनामापछि सदस्यले पनि राजीनामाको तयारी गरेका छन् । ‘डोमिनेसनको अवस्था सहेर बस्ने अवस्था छैन । बाँकी सदस्य पनि राजीनामा दिने तयारीमा छौं,' आयोगका एक सदस्यले भने ।