कांग्रेस महामन्त्री कोइरालाको स्वास्थ्य सुधारोन्मुख
काठमाडौँ: नेपाली काँग्रेसका महामन्त्री डा शशाङ्क कोइरालाको स्वास्थ्य सुधारोन्मुख हुँदै गएको उपचारमा संलग्न चिकित्सकहरुले बताएका छन् ।
चिकित्सकहरुका अनुसार महामन्त्री कोइरालाको रक्तचाप, अक्सिजनको मात्रा र पिसाबमा बुधबारको तुलनामा सुधार हुँदै गएको छ ।
कोइरालाको स्वास्थ्य अवस्थाका बारेमा जानकारी गराउन अस्पतालमा आयोजित पत्रकारसम्मेलनमा डा लव जोशीले महामन्त्री कोइरालाले आँखा खोल्ने, चिन्नुभयो भन्दा टाउको हल्लाउने गरेको बताए ।
आवश्यक थोरै औषधिका साथ भेन्टिलेसनमा राखिरहेका कारण खतरामुक्त भन्न नसकिने जानकारी गराउँदै डा जोशीले यही अवस्था रहिरहे एक–दुई दिनमा पुनः स्वस्थ अवस्थामा फर्कन सक्ने बताए ।
डा जोशीले यही अवस्थामा स्वास्थ्य सुधार हुँदै गए बिहीबार साँझसम्ममा भेन्टिलेटरबाट बाहिर निकाल्न सकिने बताए ।