महामन्त्री कोइरालाको स्वास्थ्यमा सुधार
काठमाडौँ: कांग्रेस महामन्त्री डा. शशांक कोइरालाको स्वास्थ्यमा प्रयाप्त सुधारका संकेत देखिएका छन्।
चावहिलस्थित ओम अस्पतालमा मंगलबार रातीदेखि उपचाररार्थ डा. कोइरालाको स्वास्थ्यमा सुधार आएको उनको उपचारमा संलग्न चिकित्सकले बताएका छन् ।
डा. कोइरालाको रक्तचापमा सुधार आउनुका साथै चेतना स्तरमा समेत वृद्धि भएको छ । सुधारका संकेत देखिएसँगै चिकित्सकले औषधिको मात्रा घटाउदै लगेका छन् । कोइरालाको स्वासप्रश्वास सहजता आउन थालेको छ भने मिर्गौलाको काम समेत बढेको छ ।
फोक्सोले केही काम गर्न थालेपछि भेन्टिलेटरको भोलुम कम गरेको उपचारको नेतृत्व गरेका अस्पतालका मुटुरोग विशेषज्ञ डा. लभ नरसिंह जोशीले अन्नपूर्णसँग बताए ।
‘कोइरालाको यही अवस्थालाई हामीले कायम राख्न सक्यौँ र हामीले थालेका उपचारका विधि सफल भएमा पक्कै पनि उहाँको स्वास्थ्य अवस्थामा उल्लेखनीय सुधार आउने छ,' डा जोशीले भने, ‘त्यसका लागि सबै विशेषज्ञ चिकित्सज्ञ निरन्तर लागिपर्नुभएको छ ।'
बिहीबार अस्पतालले जारी गरेको विज्ञप्ति अनुसार कोइरालाले सांकेतिक भाषा समेत बुझ्न थालेका छन् । भने उनले आफन्तलाई चिन्न समेत थालेका छन् ।
पेट दुःखाइ, खोकी र स्वासप्रश्वासमा असहज भएपछि अस्पताल भर्ना भएका कोइरालाले मंगलबार राती सुतिरहेका बेला अचानक वान्ता गर्दा सर्किदा तरल पदार्थ फोक्सोमा पुग्दा उनको स्वास्थ्य अवस्था जटि बनेको थियो ।
चिकित्सकले उनको स्वास्थ्य अवस्थालाई मल्टिअर्गान डिस्फङसनका रुपमा लिएका छन् । कोइरालाको स्वास्थ्यमा सुधारका संकेत देखिए पनि अझै उनको स्वास्थ्य अवस्था खतरामुक्त भने नरहेको चिकित्सकले बताएका छन् ।
प्रतिक्रिया दिनुहोस !
