मुस्लिम महिलाद्वारा हिन्दुलाई दागबत्ती
हैदराबाद: भारतको तेलंगाना राज्यको वारंगल जिल्लामा एक मुस्लिम महिलाले हिन्दु वृद्धको शवमा दागबत्ती दिएकी छन् ।
वारंगलको एक वृद्धाश्रममा रहेका हिन्दु धर्मावलम्बी वृद्ध बितेपछि ती मुस्लिम महिलाले उनको अन्तिम संस्कार गरेकी हुन् ।
ती वृद्धका छोराले हिन्दु धर्म त्यागेर क्रिस्चियन धर्म अँगालेका थिए । क्रिस्चियन बनेपछि उनको परिवारले ती वृद्ध बाबुलाई उपेक्षा गरेको थियो ।
उनीहरूले घरबाटै निकालिदिएका थिए । याकुब बी नामक मुस्लिम महिलाले श्रीमान्का साथ मिलेर वृद्धाश्रम सञ्चालन गरेकी छन् ।
परिवारले छोडेपछि कयौं वर्षसम्म सिलाइबुनाइको काम गर्दै आएका के. श्रीनिवासको गत मंगलबार राति निधन भएको थियो । सत्तरी वर्षको उमेरमा उनको मृत्यु भएको थियो ।
उनको सन्तानले बाबुको अन्त्येष्टि नगर्ने भएपछि याकुब बीले सबै धार्मिक रीतिरिवाज पूरा गरी श्रीनिवासको अन्तिम संस्कार गरेकी हुन् ।
श्रीनिवास करिब २ वर्षअघि एक बस स्टपमा फेला परेका थिए । उनले वृद्धाश्रम सञ्चालन गर्दै आएकी याकुबसँग आफूलाई परिवारले तिरस्कार गरेको बताएका थिए ।
श्रीनिवासको मृत्यु भएपछि याकुबले उनका छोरालाई बाबुको मृत्यु भएको जानकारी दिएर बोलाएकी थिइन् । मृतकका छोरा वृद्धाश्रममा त आए तर बाबुको अन्त्येष्टि नगर्ने बताए । आफू हिन्दु धर्म छोडेर क्रिस्चियन धर्मावलम्बी भइसकेको र आफ्ना बाबु हिन्दु भएकाले उनको किरिया कर्म नगर्ने बताए ।
आफूलाई जन्म दिएका बाबुको अन्त्येष्टि समेत नगर्ने छोराको भनाइले याकुब चकित भइन् । आफ्ना बाबु समानका सँगै बस्दै आएका व्यक्तिको शव अलपत्र हुन दिन उनले उचित मानिन् ।
छोराले उपेक्षा गरे पनि आफ्नो वृद्धाश्रममा बसेका व्यक्तिको शवको अन्त्येष्टि गर्ने निर्णय गरिन् । याकुबले श्रीनिवासका सन्तानले गर्नुपर्ने कर्तव्य गर्दै हिन्दुका धार्मिक विधि पूरा गरी दागबत्ती दिइन् ।
प्रतिक्रिया दिनुहोस !
