विषालु च्याउ खाएर गोरखामा दुईको मृत्यु
गोरखाः जङ्गली बिषालु च्याउ खाएर गोरखामा दुई जनाको मृत्यु भएको छ । गोरखाको काशिगाउँका तीन नातिनी बज्यै मध्ये दुई जनाको मृत्यू भएको हो ।
काशिगाउँ ८ की ६५ बर्षीया फूलमाया गुरुङ र उनकै नातिनी पर्ने काशिगाउँ ७ की ११ बर्षकी रविना गुरुङको मृत्यु भएको हो । अर्की नातिनी सात बर्षीया तिर्सना गुरुङ बिरामी छन् ।
उनीहरुले बुधबार राति च्याउको तरकारी खाएका थिए । दुई दिन बिरामी हुँदा पनि कसैले थाहा नपाएका रबिनाको शुक्रबार बिहान र फूलमायाको शुक्रबार दिउसो दुई बजेतिर मृत्यू भएको स्थानीय आशबहादुर घलेले जानकारी दिए ।
‘बुधबार गाई चराउन जाँदा जंगली च्याउ टिपेर ल्याई बेलुका खाएका रहेछन्’ कांग्रेसका गाउँ सचिवसमेत रहेका घलेले टेलिफोनमा भने ‘बिहिबार दिनभर झाडाबन्ता भएछ । तर कसैले थाहा पाएनन् ।
शुक्रबार बिहान एकजनाले थाहा पाएर नातिनीलाई बोकेर घरमा ल्याए र हेल्थपोष्टमा उपचार गरे तर सलाइन पानी दिँदा दिदै मरिन् ।’ नातिनीको मृत्यूपछि बज्यैको अबस्था बारे बुझ्न गएका स्थानीयबासी र स्वास्थ्यकर्मीले उनको उपचार गरेका थिए ।
तर बचाउन नसकेको उनले बताए । ‘हेल्थपोष्ट उपचार नभएपछि झारफुक पनि गरेका थिए’ उनले भने ।
घटनाबारे शनिबार बिहान मात्र जानकारी पाएको भन्दै प्रहरी उपरीक्षक जनकराज पाण्डेले मान्बु चौकीबाट प्रहरी घटनास्थलतर्फ पठाएको बताए ।
प्रतिक्रिया दिनुहोस !
