शशांक र उपचार
डा. शशांक कोइराला औपचारिक ‘भीभीआईबी’ हैनन् । तर उनी नेपालको राजनीति र स्वास्थ्य क्षेत्रमा परिचित व्यक्तित्व हुन् । बीपी कोइरालाको छोराका रूपमा र यता आएर नेपाली कांग्रेसले विगत नौ वर्षसम्म अँगालेको गणतन्त्र, संघीयता तथा धर्म निरपेक्षताविपरीत उभिएर पार्टी महामन्त्री पदमा विजयी भएपछि उनलाई सिद्धान्ततः बीपीको नजिक मान्नेहरू धेरै छन् । स्वाभाविकै हो कि गम्भीर रूपमा बिरामी हुँदा उनले विशेष हेरचाह मात्र पाएनन्, चिकित्सकहरूले एक किसिमले कालकै मुखबाट उनलाई फर्काए ।
नेपाली राजनीतिमा केही आशा जगाएका र प्रभावकारी भूमिका खेल्ने अपेक्षा गरिएका शशांक कोइरालाको स्वास्थ्यलाभ त्यस अर्थमा उनी र उनका परिवारका लागि मात्र नभएर मुलुककै लागि सुखद समाचार हो ।
डाक्टरहरूले उनलाई पूर्ण स्वास्थ्य र खतरामुक्त घोषित गरिसकेका छैनन्, तर पनि उनीहरूको उपचारसँगै रोगीका रूपमा डाक्टर कोइरालाले पनि अनुशासित जीवनशैली र संयम अपनाए भने त्यो उनलाई निको पार्ने उनका सहकर्मी र सहधर्मी डाक्टरहरूको लागि विशेष ठूला इनाम र सम्मान सावित हुनेछ, उनको तर्फबाट । स्वास्थ्य र अनुशासित डा. कोइरालाले नेपाली राजनीतिमा थप र अपेक्षित योगदान पुर्याउन सक्नेछन् ।
उनको गम्भीर बिरामी र त्यसबाट उनी बाहिर निस्कनु एउटा पाटो हो, यो समग्र घटनाको । यसको अर्को पाटो पनि छ । नेपालमा ठूलाबडा र सरकार तथा सत्तामा पहुँच हुनेहरू बिरामी हुँदा या बिरामी परेको आशंकामा ‘चेक अप’ या उपचारका लागि बाहिर जान्छन् । नेपाली डाक्टर र स्वास्थ्य केन्द्रहरूलाई हेय दृष्टिले हेर्छन् । राष्ट्रपतिदेखि उच्च ओहोदासीन अनि सम्पन्न नेपालीले यही गर्दै आएका छन् ।
डा. कोइराला गम्भीर बिरामी भएकाले उनलाई तत्काल निकटतम अस्पतालको आपत्कालीन वार्डमा पुर्याउनु तत्कालको आवश्यकता थियो र जुन सेवा तथा स्तरीय उपचार उनले ओम अस्पतालमा पाए, त्यसलाई नतिजाका आधारमा बुद्धिमान र विवेकसम्मत मानिनुपर्छ, अन्यथा भएको भए सम्भवतः सम्बन्धित अस्पताल मात्र हैन, नेपालको समस्त अस्पतालहरू बद्नाम हुन सक्थे । शशांकको स्वास्थ्यलाभसँगै अस्पतालहरू पनि त्यस अर्थमा खतरामुक्त भएका छन् ।
यसको अर्थ डा. कोइराला ‘थप स्पेसियलाइज्ड’ उपचारको लागि बाहिर जानु हुन्न भन्ने छैन । तर नेपाली चिकित्सकहरूमा विश्वस्तरीय दक्षता र समर्पण भाव छ, उनीहरूलाई प्रोत्साहित गर्दा दक्ष जनशक्तिको पलायन रोकिने सम्भवना रहन्छ । अर्कोतर्फ प्रतिस्पर्धात्मक विश्वमा जहाँ गए पनि उनीहरूले उत्कृष्टता प्रदर्शन गर्न सक्छन् भन्ने सन्देश पनि यसले दिएको छ ।
प्रतिक्रिया दिनुहोस !
