राष्ट्रिय सहमतिको सरकारका लागि दाहालको दौडधुप

काठमाडौं: माओवादी केन्द्रका अध्यक्ष पुष्पकमल दाहाल राष्ट्रिय सहमतिको सरकार बनाउन दौडधुपमा लागेका छन् । उनले यसका लागि शुक्रबार र शानिबार रानजीतिक भेटघाट तीव्र बनाए ।

दाहाल र प्रधानमन्त्री केपी ओलीबीच शुक्रबार प्रधानमन्त्री निवास बालुवाटारमा यस विषयमा दुईपटक छलफल भएको थियो । दाहालले शुक्रबार साँझ नै यसका लागि राष्ट्रिय प्रजातन्त्र पार्टीका नेता पशुपतिशमशेर राणा र सुनिलबहादुर थापासँग छलफल गरे । दाहाललाई भेट्न नेता थापा उनकै निवास लाजिम्पाट पुगेका थिए । त्यस्तै दाहाल राणालाई भेट्न उनकै निवास विजयवास पुगेका थिए ।

दाहालले दुवै नेतालाई राष्ट्रिय सहमतिको सरकार गठनका लागि सहयोग गर्न आग्रह गरेका थिए । स्रोतका अनुसार राणा र थापा दुवैले पहिला माओवादी केन्द्रले सरकार छोड्नुपर्ने बताएका थिए । उनीहरूले पहिल यस विषयमा माओवादी केन्द्र स्पष्ट हुनुपर्ने सुझाव पनि दिएका थिए । राप्रपाका सहप्रवक्ता किरण गिरीका अनुसार दाहालले थापा र राणासँग राष्ट्रिय सहमतिको सरकार गठनका लागि आग्रह गरेका थिए ।

यस विषयमा प्रधानमन्त्री ओली र दाहालबीच शनिबार बिहान पनि वार्ता भएको थियो । प्रधानमन्त्री निवास बालुवाटारमा भएको वार्तामा राष्ट्रिय सहमतिको सरकार र त्यसका लागि सत्तारूढ दलहरूको एउटै धारण बनाउनेमा दुवै नेताबीच सहमति भएको थियो । सोही सहमतिअनुसार शनिबार ६ बजेका लागि प्रधानमन्त्री निवास बालुवाटारमा सत्ता साझेदार दलको बैठक बोलाइएको थियो । तर संसद् बैठकमा बजेट पारित गर्ने विषयमा समय अपुग भएकाले उक्त बैठक स्थगित गरिएको थियो । अब आइतबार उक्त बैठक बस्ने भएको छ ।

प्रधानमन्त्रीका प्रेस सल्लाहकार प्रमोद दाहालका अनुसार दुवै नेताबीच संविधानको कार्यान्वयन, स्थानीय निकाय निर्वाचन र राष्ट्रिय सहमतिको सरकार गठनका विषयमा छलफल भएको थियो । प्रधानमन्त्रीसँगको भेटमा दाहालले भद्र सहमतिको कुरा उठाएपछि ओलीले कुनै निर्णय गर्ने हो त्यो तत्काल गरिहाल्न आग्रह गरेका थिए । छलफलपछि राष्ट्रिय सहमतिको सरकार बनाउनका लागि पहल गर्ने र त्यो नभएसम्म यही सरकारले स्थानीय निर्वाचन गराउनेमा दुई नेताबीच सहमति भएको थियो ।