फुटबल स्टार पेले ७५ वर्षमा तेस्रोपटक बेहुलो बन्ने !!
रियो दि जेनेरियो: विश्व फुटबल महान् खेलाडी पेलेको खेल जीवनलाई लिएर अनेक किस्सा बनेका छन् । ती अधिकांश किस्सामा पेलेको फुटबल क्षमताको प्रतिविम्ब देखिन्छ । उमेरले करिब आठ दशक छुन लागेका पेलेको खेलाडी जीवन र उनको क्षमताको चर्चा अझैसम्म भइरहेकै छ ।
तर तिनै ब्राजिलियन फुटबलर पेले यतिबेला फरक सन्दर्भमा चर्चामा छन् । ७५ वर्षको उमेरमा विवाह गर्न लागेपछि यी महान् फुटबलर गैरखेलकुद विषयले चर्चामा आएका हुन् ।
अन्तर्राष्ट्रिय सञ्चारका अनुसार तेस्रो पत्नीका रूपमा पेलेले ५० वर्षीया जापानी महिलासँग चाँडै नै विवाह गर्ने भएका छन् । पेलेको स्वास्थ्यमा समस्या देखिएपछि उनको यो विवाहको मिति सरेको बताइएको छ ।
समाचार एजेन्सीहरूमा जनाइएअनुसार पेले ती जापानी महिलासँग विगत ६ वर्षदेखिसँगै बस्दै आएका छन् । अघिल्ला दुई श्रीमतीबाट पेलेका पाँच सन्तान छन् । पेलेको पहिलो श्रीमती रोसमेरी चोल्बीबाट तीन र दोस्रो श्रीमती आसिरिया नासिमेन्तोबाट दुई सन्तान छन् ।
पेलेको पहिलो श्रीमतीसँग १२ र दोस्री श्रीमतीसँग १४ वर्ष वैवाहिक जीवन टिकेको थियो । पेलेले ब्राजिललाई तीन पटक विश्वकप उपाधि जिताएका थिए । खेलाडी जीवनमा गोल मेसिनको उपनाम पाएका पेलेले १४ वर्ष लामो सिनियर अन्तर्राष्ट्रिय खेल जीवनमा ब्राजिलका लागि ९१ खेल खेल्दै ७७ गोल गरेका थिए ।
पेलेकी जेठी छोरी केली क्रिस्टिना ४९ वर्षकी भइन् । पेलेको दोस्रो श्रीमती नासिमेन्तोसँग सन् २००८ मा सम्बन्धविच्छेद भएको थियो । अनौपचारिक सम्बन्धबाट पेलेका कम्तीमा अन्य दुई सन्तान पनि जन्मिएका थिए ।
सन् १९६४ मा एक घरेलु कामदारबाट जन्मिएकी सान्द्रा माचाडोलाई पेलेले अस्वीकार गरे पनि कानुनी लडाइँ र परीक्षणपछि उनी पेलेकै छोरी भएको पुष्टि भएको थियो । सन् २००६ मा सान्द्राको निधन भए पनि पेलेले अझै उनी र उनका सन्तानसँगको सम्बन्धलाई स्वीकार गरेका छैनन् ।
पत्रकार मार्सिया आकोईसँगको सम्बन्धबाट जन्मिएकी छोरीलाई भने पेलेले स्वीकार गरेका छन् । ब्राजिलमा मेडिकल सामग्रीको आयातनिर्यातको व्यापार गर्दै आएकी जापानी महिला मार्सिया आओकीसँग विवाह गर्ने जमर्को पेलेले दुई वर्षअघि नै गरेको बताइएको छ ।
प्रतिक्रिया दिनुहोस !
