गृहमन्त्री भन्छन्ः प्रहरीले नागरिकसँग सम्बन्ध बढाउनुपर्छ
काठमाडौँः गृहमन्त्री शक्ति बस्नेतले नागरिकसँगको सम्वन्ध र सहकार्य मजबुत नभएसम्म प्रहरीप्रतिको विश्वास बढ्न नसक्ने बताएका छन् ।
नेपाल प्रहरीले ल्याएको ‘प्रहरी मेरो साथी’ नामक कार्यक्रमलाई सोमबार सम्बोधन गर्दै गृहमन्त्री बस्नेतले राज्य र जनतालाई एकीकृत गर्ने जिम्मेवारी र माध्यम प्रहरीको भएको बताए ।
मन्त्री बस्नेतले प्रहरी र जनताबीच गहिरो विश्वास बन्नु अहिलेको आवश्यकता भएको बताए । सुरक्षानिकाय र प्रहरीको सम्बन्धलाई थप मजबुत र विश्वासिलो बनाउन ‘प्रहरी मेरो साथी’ नामक कार्यक्रम प्रभावकारी हुनसक्ने गृहमन्त्री बस्नेतको भनाइ थियो । उनले ‘प्रहरी मेरो साथी’ कार्यक्रम प्रभावकारी ढंगले कार्यान्वयन भए जनतासँगको सम्वन्ध विश्वासिलो बन्ने बताए ।
कार्यक्रममा संस्कृतिविद् सत्यमोहन जोशीले ‘प्रहरी मेरो साथी’ मात्र नभइ ‘प्रहरी हाम्रो साथी’ बन्नुपर्ने बताए । प्रहरी कागजमा मात्र नभएर व्यवहारमा समेत साथी बन्नुपर्र्ने भन्दै ‘प्रहरी मेरो साथी’ कार्यक्रममको कार्यान्वयन पक्षमा जोड दिए ।
जोशीले भने, ‘विगतमा पनि प्रहरीले यस्ता कार्यक्रमहरु ल्याएका हुन् तर ती कार्यक्रमहरु प्रभावकारी कार्यान्वयन भएनन् । यो कार्यक्रम त्यस्तो नहोस ।’
‘प्रहरी मेरो साथी’ कार्यक्रमको प्रतिफल जनताले प्रत्यक्ष अनुभन गर्न पाउनुपर्ने जोशीको भनाइ थियो । प्रहरी महानिरीक्षक उपेन्द्रकान्त अर्यालले प्रहरी संगठन कुनै व्यक्ति र संस्थाको हित र आदेशमा नभइ विधि र राज्यको कानुनका आधारमा चल्ने बताए ।
महानिरीक्षक अर्यालले भने, ‘माथिको आदेशले मात्र प्रहरी परिचालन हुँदैन । कानुन र विधिका आधारमा प्रहरी चल्छ ।’ उनले प्रहरीले दिने सेवा र जनताका आंकाक्षाबीच भएको खाडल पुर्न ‘प्रहरी मेरो साथी’ कार्यक्रम महत्वपुर्ण हुने बताए ।
प्रतिक्रिया दिनुहोस !
