लर्डसमा नेपालले एमसिसीलार्इ ४१ रनले हरायो
काठमाडौं: क्रिकेटको मक्का मानिने इङ्ल्यान्डको लर्डस मैदानमा मंगलबार भएको मैत्रिपुण एकदिवशिय खेलमा नेपाली टोली विजयी भएको छ । विश्वको सबैभन्दा पुरानो क्रिकेट क्लब मेरिलिबोन क्रिकेट क्लब (एमसिसी)सँग भएको खेलमा नेपाल ४१ रनले विजयी भयो ।
टस जितेपछि पहिला ब्याटिङ गरेको नेपाली टोलीले निर्धारित ५० ओभरमा आठ विकेट गुमाएर दुई सय १७ रन जोडेको थियो । नेपाली टोलीको पालीमा प्रारम्भिक ब्याट्सम्यान ज्ञानेन्द्र मल्लले सर्वाधिक ३९ रन जोडे । कप्तान पारस खड्काले ३०, शरद भेषावकरले २७, सागर पुनले २६, राजु रिजाल र बसन्त रेग्मीले २४/२४ तथा सोमपाल कामीले २० रन जोडेका थिए ।
प्रारम्भिक ब्याट्सम्यान अनिल मन्डलले दुई र मध्यक्रमका विनोद भन्डारीले नौ रन बनाए । एमसिसीले ४७.२ ओभरमा सबै विकेट गुमाएर एक सय ७६ रन जोड्यो । बलिङतर्फ नेपालका स्पिनरले आठ विकेट हात पारे । बसन्त रेग्मी र सागर पुनले तीन तीन विकेट लिए । शक्ति गौचन र सन्दिप लामिछानेले एक एक विकेट हात पारे ।
तेज बलर सोमपाल कामीले दुई विकेट लिए । एमसिसीका प्रारम्भिक ब्याट्सम्यान एडायर एक्लैले एक सय रन बनाए । विकिलसनले २० र क्लार्कले १६ रन जोड्नुबाहेक एमसिसीका अन्य ब्याट्सम्यानले दोहोरो अंकमा रन जोड्न सकेनन् । एमसीसीले ३५ रन जोड्दा शक्तिले पहिलो विकेट झारेका थिए । अन्तिम समयसम्म टोलीलाई समाल्ने प्रयास गरेपनि एडायरलाई बसन्तले आउट गरेका थिए ।
एमसिसीको निमन्त्रणापछि नेपालले लर्डसमा खेल्ने मौका पाएको हो । नेपालले अब अगष्ट १३ र १५ तारिखमा नेदरल्यान्ड्सविरुद्ध आईसिसी वल्र्ड क्रिकेट लिग च्याम्पियनसिप खेल खेल्ने छ । एमसिसीसँग खेल्नुअघि इङ्ल्यान्डमा खेलेका सबै चार वटा अभ्यास खेलमा नेपाली टोली विजयी भएको थियो ।