सातौं राष्ट्रिय खेलकुदमा ३२ खेल

काठमाडौं: आगामी मंसिरमा पूर्वाञ्चलमा आयोजना हुने सातौं राष्ट्रिय खेलकुद प्रतियोगितामा ३२ वटा खेल समावेश गरिने भएको छ । सातौं राष्ट्रिय खेलकुद कार्यकारी समितिको बिहीबार सातदोबाटोमा बसेको बैठकले उक्त निर्णय गरेको हो ।

समितिका अध्यक्ष एवं राष्ट्रिय खेलकुद परिषद् (राखेप) का सदस्यसचिव केशवकुमार विष्टको अध्यक्षतामा बसेको बैठकले शारीरिक सुगठन, पौडी र ट्रायथलन खेलको राष्ट्रिय प्रतियोगिता यसअघि नै सम्पन्न भइसकेकाले मंसिरमा हुने प्रतियोगितामा ३२ वटा खेलमात्र समावेश गर्ने निर्णय गरेको जानकारी राखेपका प्रेस सल्लाहकार रोहितकुमार दाहालले दिए ।

सातौं राष्ट्रिय खेलकुदको एथलेटिक्सअन्तर्गत म्याराथन पनि यसअघि नै आयोजना भइसकेकाले आगामी मंसिरमा हुने प्रतियोगितामा म्याराथनको स्पर्धा पनि समावेश गरिने छैन । मंसिरमा हुने राष्ट्रिय खेलकुदमा म्याराथनबाहेकको एथलेटिक्स प्रतियोगिता सञ्चालन हुनेछ । यसैगरी बैठकले खेलाडी दर्ता साउन २५ देखि भदौ २० गतेसम्म, जिल्ला छनोट प्रतियोगिता भदौ २५ देखि असोज १४ गतेसम्म र क्षेत्रीय छनोट प्रतियोगिता कात्तिक २३ देखि मंसिर ३ गतेसम्म गर्ने निर्णय गरेको छ ।

गत आइतबार सम्पन्न राखेपको १०६ औं बोर्ड बैठकले सातौं राष्ट्रिय खेलकुद पूर्वाञ्चलमै मंसिर ८ देखि १५ गतेसम्म आयोजना गर्ने निर्णय गरेको थियो । यसअघि बजेटको समस्या र मधेस आन्दोलनले गर्दा दुईपटक मिति घोषणा भए पनि सातौं राष्ट्रिय स्थगित भएको थियो । २०७२ सालमा सातौं राष्ट्रिय पहिलोपटक मंसिर ११ देखि १८ गतेसम्म र दोस्रो पटक फागुन १८ देखि २३ गते हुने भनिएको थियो ।

तयारी समिति र निर्देशन समिति गठन

नेपालले आयोजनाको जिम्मेवारी पाएको १३ औं दक्षिण एसियाली खेलकुद (साग) का लागि सरकारले दुई महत्त्वपूर्ण समिति गठन गरेको छ । यसै साता बसेको मन्त्री परिषद्को बैठकले १३ औं सागका लागि युवा तथा खेलकुदमन्त्रीको अध्यक्षतामा मूल तयारी समिति र प्रधानमन्त्रीको अध्यक्षतामा निर्देशन तथा अनुगमन समिति गठन गरेको हो ।

प्रतियोगिता आयोजनाको सम्पूर्ण जिम्मेवारी पाएको तयारी समितिमा राष्ट्रिय खेलकुद परिषद् (राखेप) का सदस्यसचिवले सदस्यसचिवकै भूमिका निर्वाह गर्नेछन् । यसैगरी निर्देशन तथा अनुगमन समितिले प्रतियोगिता तयारीको अनुगमन गर्ने तथा आवश्यक निर्णय र निर्देशन दिने काम गर्नेछ । उक्त समितिमा सभामुख, विपक्षी दलका नेता, मन्त्रीलगायतका विशिष्ट व्यक्तिहरू सदस्य रहनेछन् ।