पीडक खोज्दै बलात्कृत महिला राजधानीमा
काठमाडौं: आफूमाथि बलात्कार गरी फरार रहेका पीडकको खोजीमा नुवाकोट पीपलटारकी हरिमाया तामाङ (नाम परिवर्तन) काठमाडौं आएकी छन् । पीडकहरूले पैसा र पावरको पटकपटकको धम्कीले विचलित नभई छोराछोरी घरमै छाडी आफू यहाँ आएको तामाङले बताइन् ।
तामाङले पतिसँग सम्बन्धविच्छेद गरेको ६ वर्ष भइसक्यो । आफ्नो गुजारा चलाउन उनी नुवाकोटकै बिदुर नगरपालिकामा एउटा होटेल सञ्चालन गरेर बसेकी थिइन् । घटना चार दिनअगाडिको हो । दिनभर सिमसिमे पानीमा रुझ्दै खेतमा काम गरेर थाकेकी तामाङले गाउँमै काटेको बोकाको मासु पकाइरहेकी थिइन् ।
होटेलकै कोठामा पकाएर खाने गरेकाले उनले सटर आधा लगाएर मासु पकाउँदै थिइन् । यत्तिकैमा कस्तो मिठो बासना आयो भन्दै रक्सीले मात्तिएका तीनजना पुरुष उनको पसलमा छिरे । आज पसल खोलेको छैन भनेपछि पनि उनीहरूले जिद्दी गर्दै भोड्का, बियरलगायतका मादक पदार्थ मगाएर खाए ।
उनले आफ्नो साथीसँग मिलेर होटेलसँगै गेस्ट हाउस सञ्चालन गरे पनि केही समययता साथी बाहिर गएकाले गेस्ट हाउस बन्द थियो । मात्तिएका ती पुरुषले आज हामी यहीं बस्छौं भन्दा उनले अहिले गेस्ट हाउस नचलाएकाले आफ्नो हिसाब चुक्ता गर्न भनिन् । तर उनीहरूले कोठा देखा नत्र यही मार्छु भन्दै सटर ढ्याप्प बन्द गरिदिए ।
चार सन्तानमध्ये दुईजना मलेसियामा वैदेशिक रोजगारीमा गएका छन् भने अर्को एउटा छोरालाई होस्टेलमै राखेर पढाइरहेकी छन् । अरूले फालेका बच्चालाई ल्याएर उनले छोरी बनाएकी छन् । तिनै सात वर्षीया बालिका मात्रै उनीसँग थिइन् । उनलाई जबरजस्ती समातेर एउटा कोठामा थुनेपछि ती पुरुषले तामाङलाई कोठा देखाउन लैजान बाध्य बनाए ।
भर्याङमा आधा जतिमाथि पुगिसकेपछि लछारपछार गर्दै कोठामा लगेर थुनेर उनीमाथि तिनैजनाले रातको १२ बजेसम्म सामूहिक बलात्कार गरिरहे । मेरो पैसा पनि चाहिँदैन मलाई जान दे भनेर धेरै रोइकराइ गर्दा पनि उनलाई ‘चुप् लागेर बस नत्र मारिदिन्छु' भन्दै अत्याचार गरिरहे ।
उनीहरू निदाएपछि मौका छोपेर बल्लतल्ल उनी फुत्किइन् । हिलो बाटोमा चिप्लँदै लड्दै जिल्ला प्रहरी कार्यालय नुवाकोटमा पुग्न सफल भइन् । त्यहाँ पनि प्रहरीले महिला भएर १२ बजेसम्म होटेल खोल्ने भन्दै उल्टै उनलाई गाली गर्यो । उनको वेदना देखेर उनीहरूले उजुरी दर्ता गरे । फर्केर उनी घर पुग्दा पसलमा भएका रक्सी, चुरोट, पैसालगायतका केही बाँकी थिएनन् । उनीहरूले जंगलमा गएर ती सबै खान थालेका रहेछन् ।
प्रहरीले खोज्ने क्रममा दिनेश घले पक्रियो । नेपाली सेनामा कार्यरत अर्का आरोपितलाई प्रहरीले भोलिपल्ट बिहान पक्रियो । प्रेम थापा नाम गरेका अर्का आरोपित फरार छन् । ‘त्यो आर्मीका मान्छेले त मलाई दुई लाखसम्म दिन्छु तेरो हात मात्रै समातेको हो भन् भनेर मलाई धम्की दिने गरेका छन्', तामाङले रुँदै भनिन्, ‘मलाई पैसाले के गर्नु ? न्याय चाहिन्छ । मलाई जस्तै हिंसा अरू दिदीबहिनीमाथि नहोस् ।'
उनले भनिन्, ‘छोराले महिनामा एक लाख पठाउँछ । आमा भाइबहिनी लिएर काठमाडौं नै गएर बस्नु भनेको छ । तर म यता आए फेरि गाउँलेले भागेर गई भन्छन् ।'
आरोपित प्रेम थापा काठमाडौं आएको भन्ने सुनेपछि पीडकलाई पक्रन सहयोग माग्न उनी माइती नेपालमा आइपुगेकी छन् । माइती नेपालमा संलग्न अधिवक्ता सजनी जोशीले उनका पीडकलाई खोज्न सक्दो सहयोग गर्ने बताइन् ।
जिल्ला प्रहरी कार्यालय नुवाकोटका प्रहरी सहायक निरीक्षक सलामसिंह तामाङले पीडकको खोजीका लागि आफूहरूले सबैतिर खबर गरेकाले चाँडै पक्रने बताए ।
प्रतिक्रिया दिनुहोस !
