डुबानले झापाका सय भन्दा बढी परिवार विस्थापित
झापा: अविरल बर्षाका कारण खोलाहरुमा आएको बाढीका कारण झापामा हजारौं घर परिवार विस्थापित भएका छन् । राजमार्ग दक्षिणका क्षेत्र जलमग्न बनेको छ । देउनीया खोलामा आएको बाढीका कारण पृथ्विनगर क्षेत्रका विभिन्न भाग डुबानमा परेको छ । मेची नदीमा पानीको सतह बढेपछि हनुमान मन्दिर छेउमा रहेका स्थानीयबासीलाई अन्यत्र लगिएको छ ।
विगत केही दिनदेखिको अविरल बर्षाका कारण अन्दुवा खोलाको भंगालो फुटेर शहर पसेपछि विर्तामोड नगरपालिकाका विभिन्न भाग डुवानमा परेको छ । जसका कारण सयौं घर परिवार विस्थापित भएका छन् ।
शनिअर्जुन नगरपालिकामा पर्ने महानन्द पुलबाट उत्तरदेखि अन्दुवा खोला आसपासका बस्ती सबै डुवानमा परेका छन् । गए रातिदेखि विर्तामोडको अतिथि सदन अघिल्तिरको सडकमा अन्दुवा खोलाको भंगालो बगिरहेको छ । अतिथि सदन आसपासका घर सबै डुबेका छन् ।
अन्दुवा खोलाले पूर्व पश्चिम राजमार्गको अन्दुवा पुल नाघ्ने अवस्थामा पुगेको छ । ट्राफिक प्रहरीले पालैपालो सवारी आवागमन गराइरहेको छ । जग्गा अतिक्रमणले साँघुरिएको अन्दुवा खोलाले खोला आसपासका राजमार्ग दक्षिणका गाउँ सबै डुबानमा परेका छन् ।
अतिथि सदन उत्तरबाट अन्दुवा खोलाको बाढी बस्तीमा पसेको हो । अतिथि सदन जाने बाटोमा खोलो पसेपछि आवतजावत अवरुद्ध भएको छ । त्यहाँ रहेका पसलमा पानी पसेपछि व्यवसायीले लाखौँको नोक्सानी व्यहोर्नु परेको जनाइएको छ ।
झापाको कनकाई, विरिङ, रतुवा लगायतका नदीमा आएको बाढी बस्तीमा पस्न थालेपछि आसपासका घर डुवानमा पर्न थालेका छन् । तीन दिनयता झापाको घेरावारी, चकचकी, राजगढ, खजुरगाछी क्षेत्रका करिव सय घरपरिवार विस्थापित भएका छन् । पहाडी जिल्लामा पानी पर्ने क्रम तीव्र भएकाले झापाका नदी नालामा बाढी आएको हो ।
झापाको रतुवा खोलामा आएको बाढीले बाँध भत्काउन थालेको जिल्ला प्रहरी कार्यालय झापाले जनाएको छ । लखनपुर–२ स्थित रतुवा खोलाको बाँध फुट्दा लखनपुर र गौरादहका दर्जनौ घर डुब्ने र सयौं विस्थापित हुने सम्भावना बढेर गएको छ ।
विर्तामोड भद्रपुर सडक खण्डको हर्चना चोक नजिक बाढी सडकमा पसेपछि विर्तामोड भद्रपुरको सवारी आवागमन समेत अवरुद्ध भएको इलाका प्रहरी कार्यालय विर्तामोडका प्रमुख प्रहरी नायब उपरीक्षक खडगबहादुर खत्रीले जानकारी दिए ।
प्रतिक्रिया दिनुहोस !
