विप्लव माओवादीले गुड्दै गरेको ट्रक जलाए
दमौलीः नेकपा माओवादीका कार्यकर्ताहरुले तनहुँमा एक ट्रकमा आगजनी गरेका छन् । बन्दमा सवारी चलाएको भन्दै माओवादी कार्यकर्ताले आगजनी गरेका हुन् ।
सोमबार बिहान बन्दीपुर ४ स्थित पृथ्वी राजमार्गमा गुडिरहेको ना ४ ख ३९१ नम्बरको ट्रकलाई रोकेर माओवादीका कार्यकर्ताले आगजनी गरेका थिए । घटनालगत्तै पुगेको नेपाल र सशस्त्र प्रहरीको टोलीले आगो निभाएको थियो ।
ट्रक गुडिरहेकै अवस्थामा रोकेर आगो लगाएका उनीहरुले ट्रकका चालक र सह चालकलाई भने बाहिर निकालेका थिए ।
प्रहरीले तुरुन्तै आगो निभाएका कारण ट्रकको अग्रभागमा केही क्षति पुगे पनि पुरै जल्नबाट बचेको प्रहरीले जनाएको छ ।
स्कर्टिङमा सवारी साधन
यसैबीच, तनहुँ प्रहरीले स्कर्टिङ गरेर छोटो तथा लामो दुरीका सवारी साधन कटाएको छ । कास्कीबाट प्रहरीको स्कर्टिङमा तनहुँको कोत्रे आएका सवारी साधनलाई स्कर्टिङमा तनहुँ कटाइएको प्रहरी नायब उपरीक्षक सुरेन्द्रबहादुर गुरुङले जानकारी दिए ।
प्रहरीका प्रत्येक इकाइले आफ्नो क्षेत्रबाट सवारी साधन कटाएर स्थानीय इकाइको जिम्मामा छाडेका छन् । चितवनको मुग्लिङ पुलसम्म स्कर्टिङ गरिएको प्रहरीले जनाएको छ ।
बन्द गराउन राजमार्गमा उत्रिएका ६ जना कार्यकर्ताहरुलाई दमौलीबाट प्रहरीले नियन्त्रणमा लिएको छ ।