झापामा बाढीले दुईजनाको मृत्यु, एक बेपत्ता
बिर्तामोडः अबिरल वर्षापछि आएको बाढीका कारण झापामा दुई जनाको मृत्यु भएको छ । एक जना बेपत्ता भएका छन् भने ९ सय घरपरिवार विस्थापित भएका छन् ।
नेपाल रेडक्रस सोसाइटी झापाका अनुसार गोलधाप–८ निवासी ६४ वर्षीय कालीबहादुर लिम्बू र गौरादह–५ निवासी ३६ वर्षीय टेकेन्द्र खड्काको मृत्यु भएको हो । कुमरखोद–४ स्थायी बसोबास गर्दै आएका भारत घर भएका १८ वर्षीय कालु भनिने बाबुलाल मर्डीलाई माई खोलाले बगाएर बेपत्ता बनाएको छ ।
झापामा सोमबार केही मात्रामा वर्षा रोकिएको छ । मैनाचुलीमा रहेको कनकाई जलमापन केन्द्रमा पछिल्लो २४ घन्टामा ९७.४० मिलिमिटर वर्षा मापन गरिएकोे छ ।
वर्षापछि आएको बाढीले विस्थापित हुनेहरुको विवरण सङ्कलन गर्ने काम भइरहेको नेपाल रेडक्रस सोसाइटी झापाका सभापति लोकराज ढकालले जानकारी दिए । बाढीबाट हजारौँ मानिस प्रभावित भएको जनाइएको छ। विस्थापित भएकालाई राहत वितरण कार्य भइरहेको झापाका प्रमुख जिल्ला अधिकारी मदन भुजेलले बताए ।
झापाका मेची, निन्दा, विरिङ, कनकाई, रतुवालगायतका नदीमा पानीको सतह बढेपछि धेरै घरपरिवार विस्थापित भएका हुन् । बाढीका कारण के कति आर्थिक क्षति भयो सोको विवरण आउन नसकेको प्रमुख जिल्ला अधिकारी भुजेलले बताए ।
मेचीपारी भैंसाबाडीका एकसय २३ घर डुबे
केही दिनदेखिको अविरल वर्षाको कारण मेची नदीमा पानीको बहाव बढेपछि भद्रपुर नगरपालिका वडा नम्बर १ को भैंसाबाडी टोलको पश्चिमबाट पानीको भङ्गालो गाउँ पसेपछि पुरै गाउँ डुबानमा परेको छ ।
गाउँ डुबान भएपछि नेपाली सेना, सशस्त्र प्रहरी, नेपाल प्रहरी, पृथ्वीनगर र र पाठामारीका स्थानीयबासीको सहयोगमा डुङ्गा प्रयोग गरि उक्त गाउँका एक सय २३ घरधुरीका ६२२ जनालाई उद्धार गरीर हिमाली उच्च मा.वि.पृथ्वीनगर र हिमाली चोकको बजारको सेडमा स्थानान्तरण गरिएको भद्रपुर नगरपालिकाका कार्यकारी अधिकृत सन्तोष घिमिरेले जानकारी दिए ।बाढी पीडितलाई सामुहिक भोजनको व्यवस्था गरिएको अधिकृत घिमिरेले बताए ।
प्रतिक्रिया दिनुहोस !
