'अब खाएर सशक्त आन्दोलन गर्छु'

काठमाडौं: यसअघि भएको सम्झौता कार्यान्वयन गर्न सरकारले सहमति जनाएपछि प्राध्यापक डा. गोविन्द केसीले १६ औं दिनमा ‘आमरण अनशन' तोडेका छन् । अनशन तोडे पनि आफ्नो आन्दोलन नसकिएको दाबी गर्दै डा. केसी आफ्नो स्वास्थ्य सुधारका लागि अनशन बसिरहेको कोठाबाट त्रिवि शिक्षण अस्पतालको मेडिकल वार्डको ‘क्याबिनमा' सरेका छन् ।

डा. केसीले गोरखा लो गाविसका ३० वर्षीय भिक्षु छेवाङनोर्बु लामा, सिन्धुपाल्चोकका भूकम्प प्रभावित पाँच वर्षीय बालक सरोज नेपाली, आफैंबाट उपचार गराइरहेकी सिरहाकी ४० वर्षीया अनितादेवी महतो र स्वास्थ्य मन्त्रालयका सचिव डा. सेनेन्द्रराज उप्रेतीको हातबाट जुस पिएर अनशन तोडेका हुन् । ‘मैले हिमाल, पहाड र तराईका मानिसको हातबाट जुस पिएर अनशन तोडेको छु । म चाहन्छु, यी सबै क्षेत्रका मानिसको गुणस्तरीय शिक्षा र स्वास्थ्य सेवामा समान पहुँच होस्', उनले भने ।

डा. केसीले अहिलेसम्म केही नखाई आन्दोलन गरेको र सरकारले आफूसँग गरेको सम्झौता कार्यान्वयनका लागि दबाब दिन अब खाएर सशक्त आन्दोलन गर्ने चेतावनीसमेत दिएका छन् । अनशनको सुरुमा कडा रूपमा प्रस्तुत भए पनि डा. केसीले लचिलो बन्दै सरकारसँग सहमति गरेर अनशन तोडेका छन् । उनले भने, ‘चिकित्सा शिक्षा र स्वास्थ्य सेवा सुधारका लागि अझ ठूलो लडाइँ आवश्यक छ ।'

यसअघिका अनशन तोड्ने बेला चिकित्सक, शुभचिन्तक र सर्वसाधारणको बाख्लो उपस्थिति रहने त्रिवि शिक्षण अस्पतालमा सोमबार भने न्यून संख्यामा मानिस भेला भएका थिए । ‘इएनटी' भवनको एउटा कोठामा डा. केसीले अनशन तोड्दा केही प्राध्यापक, सञ्चारकर्मी, विद्यार्थी र विवेकशील पार्टीका नेताकार्यकर्ता देखिए ।

 

डा. केसीले जुस पिएपछि त्यहाँ पुगेका पूर्वमुख्यसचिव लीलामणि पौडेलले सरकारसँग भएको सम्झौता कार्यान्वयनका लागि निरन्तर दबाब दिनुपर्ने बताए । ‘एकजनाले मात्र बोलेर वा कराएर मुलुकको विकास हुँदैन । सबैको सामूहिक प्रयास आवश्यक छ', उनले भने ।

नेपाली कांग्रेसका सांसद गगन थापाले डा. केसीले उठाएका पूरा गर्न मिल्ने माग कार्यान्वयनमा सरकारले सम्झौता गरिसकेको र बाँकी संसद्भित्र प्रवेश गरिसकेकाले त्यसको कार्यान्वयनको जिम्मा आफूहरूमा आएको बताए । उनले भने, ‘केसी सरका मागलाई लिएर जसरी अहिले समाज विभाजित छ, त्यसैगरी सांसदहरू पनि विभाजित छन् । उहाँको मागमा सांसदहरूले बेवास्ता गर्न खोज्नुभयो भन्न खोजेको छैन । अख्तियार प्रमुखमाथि महभियोगको प्रस्ताव संसद्मा दर्ता गर्दा हामीले ठूलै जोखिम मोल्नुपरेको छ ।'

डा. केसीले मुख्य रूपमा उठाएको र विवादित बनेको प्रस्तावित मनमोहन मेमोरियल मेडिकल कलेज सरकारले किन्नेलगायत मागमा सहमति जनाएपछि अनशन तोडेका हुन् । यसअघि सोमबार बिहान माओवादी केन्द्रका नेता जनार्दन शर्माले डा. कसीलाई भेटेर पुनः अनशन बस्न नपर्ने गरी सरकारले गरेका सम्झौता पूरा गर्ने प्रतिबद्धता जनाएका थिए ।

सहमति हुनुअघि आइतबार साँझ डा. केसीले बदलिँदो राजनीतिक परिस्थिति अर्थात् केपी ओलीको राजीनामापछि प्रस्तावित प्रधानमन्त्री उम्मेदवार पुष्पकमल दाहाल र उनको सहयोगी पार्टी नेपाली कांग्रेसका सभापति शेरबहादुर देउवाबाट आफूसँग भएको सम्झौता कार्यान्वयनका लागि प्रतिबद्धता खोजेका थिए ।

अख्तियार दुरुपयोग अनुसन्धान आयोगका प्रमुखमाथि महाभियोग लगाउने मागबाट भने डा. केसी पछि हटेका छन् । संसद्मा प्रवेश भइसकेको उक्त मागलाई प्रतिष्ठाको मुद्दा नबनाउन उनी सहमत भएका थिए । स्वास्थ्य कमजोर बन्दै गएको केसीको समर्थनमा हुने गतिविधि हिंसात्मकतर्फ मोडिने जोखिमसमेत देखा परेकाले दुवै पक्ष उनको अनशनको समाप्तितिर लागेका थिए ।

अनशनका कारण चिकित्साशास्त्र अध्ययन संस्थानको अध्ययनअध्यापन ठप्प थियो । मनमोहन कार्डियो थोरासिक भास्कुलर तथा ट्रान्सप्लान्ट सेन्टर र बीपी कोइराला लायन्स सेन्टरको सेवा पनि अस्तव्यस्त बनेको थियो ।