तीन सरकारी कार्यालयमा बाढी पस्यो
बेनीः अविरल बर्षापछि सोमबारराति म्याग्दीका तीन सरकारी कार्यालयमा बाढी पसेको छ । जिल्ला भु–संरक्षण कार्यालय, जिल्ला वन कार्यालय र जिल्ला पशुसेवा कार्यालय बाढीबाट प्रभावित भएका हुन ।
बेनी–अथुङ्गे सडकखण्डबाट बग्ने पानी कार्यालय नजिकै रहेको नालीबाट बग्ने गरेको थियो । तर, बेनी–दरबाङ सडकखण्डमा स्तरोन्नति गर्ने समयमा माटोको उचित व्यवस्थापन नगर्दा बाढी सरकारी कार्यालयतिर सोझिएको हो ।
जिल्ला भु–संरक्षण अधिकृत दिवाकर पौडेलले निरन्तरको बर्षा र माटोको सहि व्यवस्थापन नहुँदा कार्यालयमा बाढी पसेको बताए । ‘बाटो पीच गर्दा केही ग्याविनले नाली व्यवस्थापन गर्नु पर्दथ्यो, तर त्यसो नहुँदा नालीको पानी सडकमा आयो, त्यसैबाट बाढी आयो', उनले भने ।
कार्यालयमा बाढी पसेपछि कम्प्युटर लगायतका महत्वपूर्ण सामाग्रीमा क्षति पुगेको छ । भुसंरक्षण कार्यालय २ वटा, जिल्ला वन कार्यालयको ३ वटा कोठा बाढीले जलमग्न देखिएको छ । त्यहाँ बसेर काम गर्नसक्ने अवस्था छैन ।
तीन वटै कार्यालयको परिसर माटोको लेदोले भरिएको छ ।नेपाली सेनाको सहयोगमा लेदो हटाउने काम भईरहेको छ । बेनी–पाखापानी सडक खण्डबाट आउने बाढीले प्रत्येक वर्ष बेनीबजारका विभिन्न क्षेत्रहरुमा क्षति पुर्याउँदै आएको छ । संरक्षणमुखी विकास नहुँदाको बर्षेनी बेनीबजारको क्याम्पसचोक क्षेत्र र मंगलघाटबासीले यस्तै समस्या झेल्न बाध्य भएका छन् ।