डुवानमा परेको भन्दै आन्दोलन !
विराटनगरः लागातारको वर्षाका कारण भएको डुवानबाट पीडित बन्नु परेको भन्दै विराटनगर ४ कन्चनबारीका बासिन्दा आन्दोलनमा उत्रिएका छन् ।
सडक अवरुद्ध बनाउँदै मंगलबार बिहानबाट आक्रोसित बनेर आन्दोलनमा उत्रिएका स्थानीय बासिन्दाले कोसी राजमार्गको विराटनगर–इटहरी सडक खण्डमा दुई घण्टा चक्का जाम गरे ।
पानी परिरहेका बेला हातहातमा कुटो र कोदालो लिएर छाता ओढ्दै आन्दोलन सुरु गरिएपछि विहान ८ देखि १० बजे सम्म सवारी आवगाम पूर्ण रुपमा प्रभावित बन्यो ।
तत्काल ढल तथा नाला निर्माणको काम गरेर डुवानको निकास दिनु पर्ने माग राख्दै आन्दोलन गर्नु परेको स्थानीय केशव आचार्यले बताए । उनका अनुसार विराटनगर उपमहानगरपालिकाको लापरवाहीका कारण स्थानीय बासिन्दा वर्षासंगै डुवानको पीडा खेप्न बाध्य छन् ।
उपहानगरले समयमा सडक तथा ढल र नाला निर्माणको काम सम्पन्न नगर्दा सर्वसाधारणले सास्ती बेहोर्नु परेको आचार्यको भनाइ छ । ‘चारैतिरबाट ताल जस्तै भएर पानी जमेको छ । कतै पनि निकास छैन,' उनले भने, ‘घरहरुको आधा जसो भाग डुवाईसकेको छ । आवत जावत गर्न सक्ने अवस्था नै छैन ।'
एक सातादेखि भइरहेको लगातारको वर्षाका कारण विराटनगरका सबै २२ वटै वडा डुवानमा परेका छन् । सबै ठाउँ जलमग्न भएका छन् ।
हातहातमा कुटो र कोदालो बोकेर स्थानीय बासिन्दा आन्दोलतमा उत्रिएपछि अवस्था केही बेर तनावग्रस्त बनेको थियो । स्थितीलाई नियन्त्रणमा लिन ठूलो संख्यामा प्रहरी परिचालन गरिएको थियो ।
समस्या समाधानका लागि प्रमुख जिल्ला अधिकारी तोयम रायाको नेत्रृत्वमा सरकारी अधिकारीको टोली कन्चनबारी पुगेको थियो । प्रजिअ रायाको आदेशमा विराटनगर उपमहानगरपालिकाले स्काईभेटर प्रयोग गरेर जाम भएको पानीलाई निकास दिने काम सुरु गरेपछि स्थानीय बासिन्दाले आन्दोलन तत्कालका लागि फिर्ता लिएका छन् ।
प्रजिअ रायाले डुवान प्रभावित क्षेत्रको चारै तिरबाट जाम भएको पानीलाई निकास दिने काम भइरहेको बताए । ‘घरका पेटी सम्म पानी पुगेको छ,' उनले भने, ‘कतिपयका घर भित्रै पानी पसिसकेको छ ।' उनका अनुसार डुवानको समस्या समाधानका लागि तत्काल काम थाल्न सम्बन्धी निकायलाई आदेश दिइसकिएको छ ।
ढल तथा नाला निर्माणले गति लिन नसक्दा घरहरु डुवानमा पर्न थालेको निस्कर्ष निकालिएको जानकारी रायाले दिए ।
प्रतिक्रिया दिनुहोस !
