स्याङ्जामा नदी किनारका बस्ती जोखिममा, कयौँ घर डुबानमा
स्याङ्जाः गएरातीको अविरल बर्षाका कारण आँधीखोला र कालीगण्डकी नदी किरानाका बस्तीमा बाढी पसेको छ । सोमबार रातीदेखि अनियन्त्रित भएको बाढील बस्ती तथा खेतमा व्यापक क्षति पुर्याएको छ ।
नदीकिनारमा रहेको धानखेतमा बाढी पसेर खोला बगेको छ । सयौं हेक्टर धानखेतलाई नराम्ररी असर पारेको छ । अविरल बर्षाका कारण केही ठाउँमा पहिरो गएपनि मानवीय क्षती भने नभएको प्रहरी उपरीक्षक देवबहादुर वोगटीले जानकारी दिए ।
पुतलीबजार नगरपालिका १ र्चौकीमा भाडामा जग्गा लिएर सामान्य पसल संचालन गर्दै आएकी चन्द्रकला थापाको घर भत्किएको छ । सदरमुकाम स्थित आँधीखोला किनारमा रहेको बंगुर फर्ममा पनि बाढीले पुरेपछि त्यहा रहेका ४५ वटा बंगुर स्थानीयबासी र प्रहरीको सहयोगमा सुरक्षित स्थानमा राखिएको छ।
पिडीखोला गाविस ८ का सेतीवेणीका १० घरभित्रै पानी पसेर जलमग्न भएको छ । गएराती २ बजेदेखि नै सेतीवेणीबासीका १० घरपरिवारका सदस्य आफनो घर छाडेर अन्यत्र बसेका छन् । घरभित्र पानी पसेपछि स्थानीयबासी भागाभाग गरेका थिए ।
यसैगरी, श्रीकृष्णगण्डकी ८ आधीमुहानमा रहेका १२ घर उच्च जोखिममा छन् । रातभर जाग्राम बसेको स्थानीयबासीको भनाइ छ । आधीमुहान छेउबाट माटो खस्ने क्रम जारी रहेको र सोही नजिकै रहेको पुलको एकतर्फीको भाग पनि जोखिमपूर्ण अवस्थामा रहेको स्थानीयबासी रत्न केसीले जानकारी दिए । उनका अनुसार पुलको जगबाट माटो खस्दै गएको छ । पानीको बहाव उच्च भएपछि कालीगण्डकी ड्यामको प्रवेशद्वार पनि खोलिएको छ ।