बस यात्रामा बुनेको कथा
धेरै समयपछि चलचित्रमा फर्कनुभयो कस्तो लागेको छ ?
नयाँ पुस्तासँग काम गर्ने, केही सिक्ने, केही सिकाउने अवसर पाएँ । खुसी छु ।
चलचित्र म त तिम्रै हुँको फिडब्याक ?
दर्शकको फिडब्याकबाट म उत्साहित छु । पानीझरी, बन्दका बाबजुद पनि हलमा दर्शक पुगेकै छन् ।
दर्शकले चलचित्रको कुन पक्ष मन पराए ?
समग्रमा चलचित्रको सबै पक्ष मन पराएका छन् । खासगरी चलचित्रको ‘सेन्टिमेन्ट’ले सबैलाई छोएको छ । चलचित्र हेरेर निस्कँदा सबैको आँखा रसाएको हुन्छ ।
अहिले त रोनाधोना चलचित्रको समय छैन नि ?
म त तिम्रै हुँ त्यो खाले चलचित्र होइन । चलचित्र हेर्दा दर्शक हाँस्छन्, रमाउँछन् अनि चलचित्रको कथाभावमा डुबेपछि भावुक हुन्छन् ।
चलचित्रमा अनमोललाई अभिनय नगराउनुको कारण ?
चलचित्रको स्क्रिप्टले नै नयाँ कलाकार खोजेको छ । कथामा म्याच नहुने भएपछि खेलाउने कुरा पनि भएन । तर अनमोलसँग सल्लाह गरेरै हामीले नयाँ कलाकार छानेका हौं ।
निर्मात्री बन्दाको अनुभव ?
यसअघि पनि मैले काजल फिल्मस्को ब्यानरबाट संयुक्त रूपमा धेरै चलचित्र बनाएकी छु । तर म त तिम्रै हुँ चाहिँ एकल चलचित्र हो । चलचित्र बनाउन सजिलो छैन । धेरै दुःख गर्नुपर्छ तर अहिले दर्शकबाट पाएको फिड्ब्याकले ती सबै दुःखहरू सुखमा बदलिएको छ ।
चलचित्रको खास दर्शक ?
यो पारिवारिक चलचित्र हो । यसमा अनावश्यक र अपत्यारिता स्टन्ड केही छैन । सपरिवार बसेर मनोरञ्जन लिने चलचित्र बनेको छ ।
कहिलेदेखि यो चलचित्रको कथा सोच्नुभएको हो ?
यो धेरै सोचेर बनाइएको कथा होइन । एकपटक इलामको पशुपतिनगरबाट बसमा काठमाडौं आउँदा मनमा आएको भावना हो । त्यसलाई बुन्दै जाँदा यो रूप लिएको हो ।
धेरै चलचित्रमा तपाईंको कथा छ, कसरी आउँछ ?
कथा तयार गर्न धेरै घोत्लिनु पर्दैन । काम गर्दै जाँदा भोगेको देखेका कुराले हिट गर्छ । त्यसलाई नै बुनेर लाने हो । मैले अभिनय गरेका सबै चलचित्रमा मेरै कथा छ । करोडपति, नेपाली बाबु, सुपरस्टार, बाबुसाहेब, म तिमी बिना मरिहाल्छु, साथी म तिम्रो आदि मेरै कथामा बनेका चलचित्र हुन् । तँ त सारै बिग्रिस् नि बद्रीमा पनि म र हरिवंश दाइ मिलेर कथा लेखेका हौं ।
कथा बुन्दा यतिको चलचित्र बन्ना भन्ने लागेको थियो ?
वास्तवमा यो चलचित्र मैले सोचेभन्दा धेरै राम्रो बनेको छ । कथाकारको दिमागमै चलचित्र हुन्छ तर पर्दामा हेर्दा मैले त्योभन्दा राम्रो पाएकी छु ।
चलचित्रमा पहिले र अहिले के फरक पाउनुभयो ?
पहिले जुनियरले सिनियरलाई साह्रै मान सम्मान गर्थे । हामी पनि सिनियरलाई त्यत्तिकै सम्मान गथ्र्यो । तर नयाँ पुस्तामा त्यो संस्कार मैले देखिनँ । अरू पक्षमा त खासै फरक देखेको छैन ।
रोकेन नाकाबन्दीले
श्रीराम महत, निर्देशक
लामो समयदेखि म्युजिक भिडियो, वृत्तचित्र एवं चलचित्र क्षेत्रमा क्रियाशील श्रीराम महतले चलचित्र म त तिम्रै हुँबाट ठूलो पर्दामा डेब्यु गरेका हुन् । निर्देशक महत यस चलचित्रको प्रारम्भिक फिडब्याकबाट उत्साहित छन् । ‘चलचित्रमा मध्यान्तरसम्म युवापुस्ताले खुब रमाइलो मान्छन् त्यसपछि इमोसनल टच सुरु हुन्छ’, निर्देशक महतले भने, ‘हामीले जस्तो सोचका साथ चलचित्र बनायौं दर्शकमाझ त्यही रूपमा स्थापित भएको छ । दर्शकको फिड्ब्याकबाट म उत्साहित छु ।’
पाँच दर्जनभन्दा बढी म्युजिक भिडियो निर्देशन गरेका उनले निर्देशन गरेको ‘द लिभिङ गडडेस’ वृत्तचित्रले क्यानडामा भएको ‘इम्याजिनेटिभ इन्डिजेनियस फिल्म फेस्टिभल’मा राम्रो प्रभाव छाड्न सफल भएको थियो । त्यसैगरी नेपाली सेनाले आयोजना गर्दै आएको सेनासम्बन्धी वृत्तचित्र प्रतियोगितामा श्रीरामले निर्देशन गरेको ‘कर्तव्य’ले केही वर्षअघि दोस्रो पुरस्कार जितेको थियो । ‘जवाफदेहिता कस्को’ कार्यक्रममार्फत महत निर्देशित एक सयभन्दा बढी वृत्तचित्र विभिन्न टेलिभिजनबाट प्रसारण भइसकेका छन् ।
छायांकनका क्रममा भारतको अघोषित नाकाबन्दीको चपेटा खेप्नु परे पनि तोकेको समयभित्रै छायांकन सम्पन्न गरिएको निर्देशक महतले बताए । ‘राम्रो होमवर्क गरेर फिल्डमा गएकाले यो सम्भव भएको हो’, निर्देशक महतले भने, ‘निर्देशकका रूपमा म टिम क्याप्टेन भए पनि सुस्मिता दिदीले बराबर काँध थापेकाले काम गर्न सजिलो भयो । छायांकन बितेको पत्तै भएन ।’
प्रतिक्रिया दिनुहोस !
