नेमार भन्छन्-ब्यक्तिगत जीवनलाई होइन खेलमा ध्यानदिनुस्

रियो: ब्राजिलियन सुपरस्टार नेमारलाई उनको क्लब बार्सिलोनाले गत महिना अमेरिकामा सम्पन्न कोपा अमेरिका फुटबल खेल्नबाट प्रतिबन्ध लगाएको थियो । तर उनी आफ्नो टोलीको समर्थन गर्न क्यालिफोर्नीया पुगे । उनको टोली ब्राजिल पेरुसँग पराजित हुँदै प्रतियोगिताबाट बाहिरिँदा उनी आफ्नी नयाँ प्रेमिकासँग प्यारापिटबाट खेल हेरिरहेका थिए ।

उनले अमेरिका बसाईका क्रममा आफ्ना नजिकका साथीहरु पप स्टार जस्टिन बाइबर, फर्मुला वान ड्राइभर लेविस ह्यामिल्टन र डिजे काल्भिन ह्यारीससँग राति अमेरिकाका बिभिन्न क्लब र बार पनि धाउन भ्याए ।

उनी अहिले आफ्नै देशमा अर्को साताबाट सुरु हुने ओलम्पिक खेलकुदका लागि तयारीमा जुटेका छन् । राष्ट्रिय टोलीमा नह्ँदा बिभिन्न क्लब र बारमा पार्टी गर्ने तथा नयाँनयाँ महिला साथी बनाउन रुचाउने नेमारले रियो ओलम्पिकका अवसरमा समेत आफ्नो त्यो ब्यवहारमा परिवर्तन नआउने बताएका छन् ।

उनले त्यसले आफ्नो खेलमा कुनै असर नपार्ने दाबी गरेका छन् । उनले सञ्चार माध्यमलाई मैदान बाहिरभन्दा पनि आफुले मैदानभित्र गरेको गतिविधिमा केन्द्रित हुन अनुरोध गरेका छन् ।

 

‘मैदान बाहिर रहँदा मैले गर्ने सबै क्रियाकलाप मेरा ब्यक्तिगत हुन् । मेरो परिवार छ, साथीभाई छन् । त्यसैले मलाई उनीहरुसँग रमाइलो गर्न मन लाग्छ । उनीहरुसँग क्लब र बार जान पनि मन लाग्छ', नेमारले भनेका छन्, ‘तर म मैदानभित्र आफ्नो जिम्मेवारीप्रति पुर्ण रुपमा सचेत छु । त्यसैले तपाइँहरु (सञ्चारकर्मी) लाई पनि म मेरो ब्यक्तिगत जीवनभन्दा मैले मैदानभित्र गर्ने गतिविधिमा मात्र केन्द्रित हुन आग्रह गर्दछु ।'

नेमारले आफ्नो उमेर र हैसियतले पनि क्लब जान प्रेरित गर्ने गरेको बताएका छन् । ‘कल्पना गर्नुहोस, यदी तपाइँहरु मजस्तै २४ बर्षको हुनुहुन्छ र मैले जत्तिकै कमाई गर्नुहुन्छ भने के तपाई मजस्तै क्लब र बार धाउन रुचाउन हुन्न र ? ', नेमार भन्छन् । ओलम्पिक खेलकुदमा यू–२३ खेलाडीले प्रतिस्पर्धा गर्ने नियम छ ।

यद्यपि नेमार कुनै पनि टोलीले २३ बर्षभन्दा बढि उमेरका तीनजना खेलाडीलाई समाबेश गर्न पाउने नियमअनुसार ओलम्पिक टोलीमा समाबेश भएका हुन् ।

नेमारले बाज्रिलबाट यसअघि सन् २०१२ मा लन्डनमा भएको ओलम्पिकमा समेत प्रतिस्पर्धा गरेका थिए । त्यतिबेला ब्राजिल ओलम्पिक फुटबलको फाइनलमा मेक्सिकोसँग पराजित भएको थियो । आफ्नो नेतृत्वमा ब्राजिललाई अहिलेसम्म उपाधि दिलाउन नसकेका नेमारले यसपटक भने उपाधि दिलाएर छाड्ने दाबीसमेत गरेका छन् ।

‘यसपटक उपाधि जित्नेमा म ढुक्क छु । हाम्रो टोली पनि बलियो छ त्यसमाथि हामी घरमै खेल्दै छौं', उनले भनेका छन्, ‘यसपटक फुटबलको स्वर्ण पदक हामी घरमै राख्नेछौं ।'