विश्व तेक्वान्दोमा नेपालका चार खेलाडी
लन्डन: बेलायतको ब्रिघट्नमा जारी १८औं सिनियर तथा १३औं जुनियर आईटीएफ विश्व तेक्वान्दो च्याम्पियनसिपमा नेपालका चारजना खेलाडीले प्रतिस्पर्धा गर्ने भएका छन् । नेपालबाट सहभागी खेलाडीमा सस्मन बस्नेत, घनश्याम आचार्य खत्री, रघुनाथ बस्नेत र लक्ष्मण बस्नेत छन् । विद्या विकास बोर्डिङ स्कुल भक्तपुरमा कक्षा १० मा अध्ययनरत सस्मनले नेपालमा भएको दोस्रो सगरमाथा खुला तेक्वान्दो प्रतियोगितामा स्वर्ण पदक जितेका थिए ।
यसैगरी घनश्यामसँग पनि सन् २०१० मा बेलायतमा भएको तेक्वान्दो विश्व च्याम्पियनसिपमा सहभागिता जनाएको अनुभव छ । उनले ब्रिटिस ओपन च्याम्पियनसिपमा पनि कांस्य पदक हात पारिसकेका छन् । रघुनाथले भने पहिलोपटक विश्वस्तरको प्रतियोगितामा सहभागिता जनाउन लागेका हुन् ।
यसैगरी लक्ष्मणले पनि नेपाललाई आईटीएफ तेक्वान्दोमा अन्तर्राष्ट्रिय पदक दिलाइसकेका छन् । उनले सन् २००४ मा मलेसियामा आयोजना भएको मलेसिया ओपनमा कांस्य पदक जितेका थिए ।
च्याम्पियनसिपमा सस्मनले १४ देखि १५ वर्ष उमेर समूहमा ६४ केजी तौलतर्फ प्रतिस्पर्धा गर्नेछन् । कलर बेल्ट प्याट्रनतर्फ प्रतिस्पर्धा गर्न लागेका घनश्यामले सिनियर ५४ केजी तौल समूहमा र रघुनाथले सिनियरतर्फको ७० केजी तौल समूहमा प्रतिस्पर्धा गर्नेछन् ।
लक्ष्मणले भने भेट्रानतर्फ ६४ केजी तौल समूहमा प्रतिस्पर्धा गर्नेछन् । लक्ष्मणले यो च्याम्पियनसिपमा रेफ्रीको भूमिकासमेत निर्वाह गर्नेछन् । नेपाली खेलाडी अहिले प्रतियोगिताका लागि अन्तिम तयारीमा व्यस्त छन् ।
प्रतिक्रिया दिनुहोस !
