माडीका सात ठाउँ डुबानमा
चितवनः चितवनको दक्षिणी क्षेत्र माडी नगरपालिकाभित्र रहेका सात ठाउँ शुक्रबार डुबानमा परेका छन् । बिहीबार रातिको वर्षाका कारण रिउ खोला गाउँ पसेपछि सात ठाउँका ८७ घर डुबानमा परेका हुन् ।
रिउ खोलाले पाँच घर बगाएको छ । जिल्ला विपद् व्यवस्थापन समिति चितवनका स्रोतव्यक्ति बलराम लुइँटेलका अनुसार माडीको रतनीमा ६, धोबाहामा २०, बनकट्टामा १६, ब्रह्मटोलमा १५, चन्द्रपुरीमा ५, रतनपुरीमा ५ र सिमरामा २० घरधुरी डुबानमा परेका छन् ।
सिमराका ५ घर रिउ खोलाले बगाएको र अमेलिया पनि डुबानमा परेको जानकारी उनले दिए । इलाका प्रहरी कार्यालय माडीले रिउ खोला मानवबस्तीमा पसेपछि घर डुबानमा परेको तर मानवीय क्षति भने नभएको जनाएको छ । डुबान क्षेत्रमा उद्धारका लागि सुरक्षाकर्मीको टोली खटाइसकिएको जिल्ला प्रहरी कार्यालय चितवनले जनाएको छ ।
यसैबीच बिहीबार रातिको अविरल वर्षाका कारण नारायणगढ-मुग्लिन सडकखण्डको चार किलोमा पहिरो गएपछि शुक्रबार बिहान दुई घन्टा आवागमन रोकिएको थियो । डोजर र एस्काभेटरले पहिरो पन्छाएपछि यातायात पुनः सञ्चालनमा आएको छ ।
मनसुनी वर्षाका कारण पहिरोले अवरुद्ध सडक खुलाउने काममा खटिनुपरेकाले सडक मर्मतमा बाधा परेको नारायणगढ-मुग्लिन सडक आयोजनाका इन्जिनियर शिव खनालले बताएका छन् । ‘चार किलोको पहिरोले सबैभन्दा बढी दुःख दिएको छ', उनले भने, ‘गाईघाट, घुमाउने, केराबारी, सेतीदोभान, सिमलताललगायत ठाउँमा ससानो पहिरो झर्ने गरेको छ ।'
प्रतिक्रिया दिनुहोस !
