‘गुन्डा तह लगाउन नागरिकसँग हातेमालो

बनेपाः नेपाल प्रहरीका माहानिरीक्षक उपेन्द्रकान्त अर्यालले फुटपाथे डन तह लगाउन नागरिकसँग हातेमालो गर्न प्रहरी अधिकृतलाई निर्देशन दिएका छन् ।
शुक्रबार काभ्रेको धुलिखेलमा नवनिर्मित कार्यालय प्रमुखको निवास उद्घाटन गर्दै आईजीपी अर्यालले नागरिक र फुटपाथे डनसँग प्रहरीले दोहोरो रोल गर्न नहुने बताए ।

‘अब प्रहरीले दोहोरो रोल खेल्न मिल्र्दैन', उनले भने, ‘कुनै प्रहरी अधिकृत डन र अपराधीसँग रातदिनसँगै बस्छ र सँगै हिँड्छ भने नागरिक समाजले त्यसलाई खबरदारी गर्दै प्रहरीलाई वान वेमा हिँडाउनुपर्छ । त्यो हो नागरिकमैत्री प्रहरी ।'

उनले दसबर्से द्वन्द्वकाल र गत वर्षको भूकम्पबाट प्रहरीका भौतिक संरचनाहरूमा क्षति पुगेको र त्यसको पुनर्निर्माणका लागि अर्बौ रुपैयाँ लाग्ने बताए । ‘द्वन्द्व र भूकम्पका कारण साधन स्रोतको अभावमा गुज्रिरहेका छौं ।

यसैका लागि नागरिकसँग हातेमालो गरेर काम गर्न लागेका हौं’, उनले भने । उनले उपस्थित प्रहरी अधिकृतलाई न्यायका लागि कार्यलमा आएका पीडितको छिटो काम र राम्रो व्यवहार गरी जतिसक्दो चाँडो न्याय दिई प्रहरीको सेवाको आभास गराउन निर्देशनसमेत दिए ।

कार्यक्रममा प्रमुख जिल्ला अधिकारी बालकृष्ण पन्थी, बागमती अञ्चल प्रहरी प्रमुख एसएसपी केदारभक्त भण्डारी, काभ्रे जिल्ला प्रहरी प्रमुख राजेशनाथ बास्तोलाले नागरिक र प्रहरी मिलेर काम गर्न सके अपराधिक क्रियाकलाप र गुण्डागर्दी निर्मुल हुनेमा जोड दिएका थिए ।

नवनिर्मित भवन बनेपा ५ का स्थानीय राजभक्त प्रधानले २९ लाख २७ हजारको लागतमा निर्माण गरी प्रहरीलाई हस्तान्तरण गरेका थिए ।